O‘zbekiston prezidenti qarori bilan aholi tomonidan to‘lovlarni amalga oshirishda qo‘shimcha qulayliklar yaratiladi. Bu haqda davlat rahbari matbuot kotibi xabar qildi.
Qayd etilishicha, 1-maydan boshlab quyida keltirilgan, benefisiari budjet va korporativ buyurtmachi hisoblangan to‘lovlar bo‘yicha to‘lov xizmatlari ko‘rsatganlik uchun vositachilik haqi (yig‘imlar) to‘lov shaklidan qat’i nazar to‘lovchi – jismoniy shaxsdan emas, balki to‘lov summasidan chegirib qolish yo‘li bilan undiriladi:
- barcha turdagi davlat boji va ma’muriy jarimalar bo‘yicha to‘lovlar;
- davlat xizmatlari markazlari tomonidan ko‘rsatiladigan davlat xizmatlari, shu jumladan Yagona interaktiv davlat xizmatlari portali orqali ko‘rsatiladigan davlat xizmatlariga to‘lovlar;
- maktabgacha, umumiy o‘rta, o‘rta maxsus, professional, oliy va oliy ta’limdan keyingi ta’lim, qayta tayyorlov, malaka oshirish hamda sog‘liqni saqlash muassasalariga to‘lovlar;
- barcha turdagi kommunal xizmatlar uchun to‘lovlar;
- MIB organlari tomonidan sud hujjatlari va boshqa organlar hujjatlarini majburiy ijro etish bo‘yicha undiriladigan to‘lovlar;
- “E-auksion” elektron savdo platformasi va “K-Savdo” avtomatlashtirilgan axborot tizimiga to‘lovlar;
- avia, temir yo‘l va boshqa jamoat transportlariga chiptalarni xarid qilishdagi to‘lovlar.
Mazkur bandda ko‘rsatilgan to‘lovlarning benefisiari hisoblangan budjet va korporativ buyurtmachilar 2023-yil 1-mayga qadar to‘lov xizmatlari ko‘rsatishga doir amaldagi shartnomalarga tegishli o‘zgartirishlar kiritiladi. Bunda, vositachilik haqi (yig‘imlar) miqdori to‘lov summasining bir foizigacha, biroq jami summasi Markaziy bank tomonidan belgilanadigan chegaraviy miqdorlardan ko‘p bo‘lmagan miqdorda bo‘lishi lozim.
2023-yil 1-mayga qadar Toshkent shahrida huquqiy eksperiment tariqasida virtual kassa bilan qamrab olingan savdo va xizmat ko‘rsatish shoxobchalarida Markaziy bank tomonidan belgilanadigan cheklangan limit va kunlik naqd pul tushumlari doirasida naqd pul yechish xizmatini ko‘rsatish amaliyoti joriy etiladi. Bunda, mazkur bandda ko‘rsatilgan naqd pul yechish xizmatini ko‘rsatish tartibi Markaziy bank tomonidan belgilanadi.
Shuningdek, Markaziy bankka Humo va Uzcard to‘lov tizimlari o‘zaro integrasiyasini bosqichma-bosqich, jumladan 2023-yil may oyiga qadar bankomatlar hamda 2023-yil yakuniga qadar to‘lov terminallari tizimini integrasiya qilish ishlarini yakunlash topshirildi.
Iqtisodiyot va moliya vazirligi Markaziy bank bilan birgalikda 2023-yil 1-sentabrga qadar Yagona g‘azna hisobvarag‘i orqali hisob-kitoblarni 24/7 rejimida onlayn tartibda amalga oshirish maqsadida Iqtisodiyot va moliya vazirligining axborot tizimini Markaziy bankning “Tezkor to‘lovlar” tizimiga integrasiya qilishni ta’minlaydi.
Ushbu o‘zgarishlar to‘lov xizmatlari bozorida ilg‘or to‘lov turlari hamda usullari salmog‘ini oshirish, sog‘lom raqobat va yangi texnologik yechimlarni qo‘llab-quvvatlash hamda aholiga qo‘shimcha qulayliklar yaratish maqsadida joriy etiladi. Qaror ijrosini nazorat qilish bosh vazir o‘rinbosari Jamshid Qo‘chqorov zimmasiga yuklatildi.
Izoh (0)