“Ўзбектелеком” акциядорлик жамияти 3–10 апрель кунлари қурилиш техникаси ижарага олиш бўйича бошланғич нархи 246 миллион 100 минг сўм бўлган тендер ўтказган. “Дарё” мухбири лот маълумотларини кўздан кечириш жараёнида харидда рақобат уюштирган корхоналар ўртасида боғлиқлик борлигини аниқлади.
Тендер “Ўзбектелеком”нинг Самарқанд филиалидаги қурилиш ишлари учун экскаватор техникасини ижарага олиш юзасидан ўтказилган. Ғолиб корхона 60 кун муддатда маҳсулотни етказиб бериши керак.
Лотни ютиш учун учта корхона рақобатлашган. Якуний натижага кўра, “Темур Газ” МЧЖ тендер ғолиби (шартнома суммаси 242 миллион 890 минг сўм), “Транс Авто Оқсой” МЧЖ захира етказиб берувчи деб топилган.
Тендер иштирокчиси бўлган тадбиркорлик субъектларининг раҳбарияти билан танишиш жараёнида шубҳали ҳолат аниқланди. Статистика агентлиги маълумотларига кўра, ғолиб “Темур Газ”нинг 100 фоизлик таъсисчиси Ҳакимов Дўстмурод Тўйчиевич ҳисобланади, раҳбар эса Ҳакимов Суннатулла Тўйчиевич. Эътиборлиси, тендерда унга рақобат қилган “Транс Авто Оқсой” МЧЖнинг таъсисчи ва раҳбари ҳам Ҳакимов Дўстмурод Тўйчиевич ҳисобланади.
“Давлат харидлари тўғрисида”ги қонуннинг 68-моддасига кўра эса, тендер иштирокчиси фақат битта таклиф беришга ҳақли.
“Дарё” мухбири ҳолат юзасидан изоҳ олиш мақсадида ғолиб тадбиркор ҳамда “Ўзбектелеком” матбуот хизмати билан боғланди. Ўзини Ҳакимов Дўстмурод деб таништирган шахс ҳақиқатдан ҳам иккала МЧЖ ўзига тегишли эканини тасдиқлади.
“Ростдан ҳам иккисининг таъсисчиси бир одам — мен. Ҳакимов Суннатулла эса акам бўлади, у директоримиз”, — деди Ҳакимов Дўстмурод Тўйчиевич.
“Ўзбектелеком”га лот бўйича юборилган сўровга қуйидагича жавоб келди:
“Тендер харид қилиш тартиб-таомилларига асосан ўтказилган. Электрон тизим техник талабларига биноан, харид комиссияси аъзолари ҳамда комиссия котиби иштирокчилар тўғрисидаги маълумотлар ва уларнинг нарх таклифларини кўриш имкониятига эга эмас, фақатгина таклифларни техник жиҳатдан баҳолаш функциясини бажаради. Иштирокчилар тўғрисидаги маълумотлар ҳамда уларнинг нарх таклифлари савдо жараёнлари тўлиқ тугагандан сўнг электрон тизим томонидан ошкор қилинади”.
Акциядорлик жамиятининг маълум қилишича, ушбу лот бўйича савдо натижалари 26 апрель куни соат 09:52 да тугаган бўлиб, аниқланган аффилланганлик ҳолати юзасидан ғолиб ва захира ташкилотлари номига шартнома имзоланмаси тўғрисида тегишли мурожаатлар юборилган.
Изоҳ (0)