Тошкент вилояти Оҳангарон давлат ўрмон хўжалиги 14–25 апрель кунлари жами бошланғич қиймати 107 миллион сўм бўлган иккита тендер ўтказди (1, 2). “Дарё” мухбири лот маълумотларини кўздан кечириш жараёнида тендер ғолиби бўлган тадбиркорлик субъекти амалда фаолиятини тўхтатганини аниқлади.
Тендерларнинг бири ўғит, иккинчиси пахта мато сотиб олиш учун ўтказилган. Уларда иккита МЧЖ иштирок этган бўлиб, Ангрен Рустам Гранд ғолиб деб топилган, Ангрен New Leadэр эса захира етказиб берувчи сифатида кўрсатилган. Иккита тендер бўйича жами шартнома суммаси 105 миллион сўмдан ортиққа баҳоланди.
Тендер иштирокчиси бўлган корхоналарнинг раҳбарияти билан танишиш жараёнида ғолиб корхона — Ангрен Рустам Гранд МЧЖ фаолият кўрсатмаётган тадбиркорлик субъекти экани маълум бўлди.
“Дарё” мухбири ҳолат юзасидан изоҳ олиш мақсадида корхона раҳбари билан боғланди. Гўшакни кўтарган шахс ўзини раҳбар Рустам Бахаровнинг укаси сифатида таништирди ва вазиятни қуйидагича изоҳлади:
“Корхона раҳбари март ойининг бошида чет элга дам олиш учун кетган эди. Раҳбар Ўзбекистонда эмасди, унинг тасдиқлови ҳам йўқ, шу сабаб фирма тендерларда иштирок этолмади. Яқинда раҳбар келди ва биз харид савдоларида қатнашишни бошладик. Фирма ёпилмаган, шунчаки раҳбар чет элда бўлгани учун фаолият қоғозда тўхтаб қолган, биз эътибор бермай қолганмиз”.
Масъуллардан ушбу тендер натижаларига эътибор қаратиб, шубҳали ҳолатларни назоратга олишни сўраймиз.
Изоҳ (0)