Украина Россия томонидан аннексия қилинган Қримнинг келажаги бўйича Украина армиясининг муваффақиятли қарши ҳужумидан кейингина Россия билан музокаралар олиб бориши мумкин. Украина армиясининг қарши ҳужуми апрель май ойларида бошланиши мумкинлиги айтилганди.
“Агар биз жанг майдонида стратегик мақсадларимизга эриша олсак ва Қрим билан маъмурий чегарага етиб борсак, бу масалани муҳокама қилиш учун дипломатик саҳифа очишга тайёрмиз”, — деди Украина президенти Владимир Зеленский офиси раҳбарининг халқаро масалалар бўйича ўринбосари Андрей Сибига Британиянинг Financial Times газетасига. Бироқ унинг сўзларига кўра, бу Қримни ҳарбий йўл билан озод этиш истисно қилинади дегани эмас.
Британия нашрининг қайд этишича Украинанинг ярим оролни қайтариб олиш қобилиятига шубҳа билан қарайдиган ғарб амалдорлари Қримни қайтаришга ҳар қандай уриниш Путиннинг урушни ядровий қурол билан авж олдиришига сабаб бўлиши мумкинлигидан хавфсирамоқда.
Украина Россия билан урушни тугатиш бўйича тўғридан тўғри маслаҳатлашувларни 2022 йил апрелида тўхтатган эди. Бунгача у Москва билан Қримнинг келажаги ҳақида музокара олиб боришга тайёр бўлган ва уни ҳарбий йўл билан қайтариш ниятини илгари сурмаган. Сентябрь ойида Россия Украинанинг тўртта вилоятини аннексия қилганидан сўнг, Зеленский Путин билан музокара ўтказишни тақиқлайдиган фармонни имзолади. Шундан келиб чиқиб, Financial Times таъкидлашича, Украина президенти офиси ходимининг баёноти 2022 йил апрелидан бери Киевнинг Россия билан музокараларга қизиқиши ҳақидаги энг очиқ баёнотга айланди.
Изоҳ (0)