Самарқандда сотувчи йигит 16 киши томонидан калтакланди (видео)

Самарқанд вилояти Нарпай туманидаги бозорларнинг бирида сотувчи йигит 16 киши томонидан калтакланди. Бу ҳақда “Миллар” дастурида хабар берилди. 

Хабарга кўра, воқеа 17 апрель куни тумандаги “Мирбозор” бозорида, сотувчи аёлнинг фарзанди ва назоратчилар ўртасида содир бўлган. Жабрланувчининг холаси жияни талаба эканини, 16 киши томонидан асоссиз калтакланганини айтиб ўтган. Шунингдек, онаси бозор маъмуриятидаги назоратчиларнинг фарзандида қандай хусумати бўлганини билмаслигини қайд этган. 

“Ҳеч ким хабар олмади: на бозор маъмурияти, на назоратчилар. Бир ўзим югуриб юрибман”, — дейди аёл. 

Бозор назоратчиси эса 4-5 киши биргаликда уни калтаклашганини айтган. Бироқ видеода бунинг акси тасвирланган. Воқеа содир бўлгач назоратчи жабрланувчининг оила аъзоларига турли таҳдидли хабарлар ҳам юборган. 

Маълум қилинишича, ҳозирда беморнинг аҳволи нисбатан қониқарли. Ҳолат юзасидан терговга қадар текширув ишлари олиб борилмоқда.