Ўзбекистонда охирги ҳафтада янги ҳосил пиёзининг улгуржи нархлари 2 баробар пасайган, бу ички бозорда ушбу маҳсулотни етказиб бериш ҳажми кескин ошгани билан изоҳланади, деб хабар бермоқда EastFruit таҳлилчилари. Ўз навбатида, мазкур ҳолат ўтган йилги пиёз ҳосили нархига ҳам таъсир қилиб, бу маҳсулотнинг улгуржи нархлари айни даврда 17 фоизга пасайган.
Нархлар мониторингига кўра, 14 апрелдан 21 апрелга қадар янги ҳосил пиёзининг ўртача улгуржи нархи 1 килограмм учун 8000 дан 4000 сўмга пасайган ва жорий ўртача улгуржи нарх 2022 йилнинг худди шу санасида қайд этилган даражага тенг бўлган.
“Агар ушбу маҳсулот нархлари ҳафталик мониторинг олиб бориладиган бошқа мамлакатлар билан солиштирилса, Ўзбекистонда янги пиёз ҳосилининг ўртача улгуржи нархи Грузияга (0,99 доллар/кг) нисбатан 2,8 баробар паст, лекин Тожикистонга (0,27 доллар/кг) нисбатан 30 фоизга юқоридир”, — дейилади хабарда.
Охирги ҳафта ўтган йилги пиёзнинг улгуржи нархлари ҳам пасайган, бу Ўзбекистон ички бозорида янги ҳосил пиёзи бўйича таклиф кескин ошгани ўтган йилги пиёз нархига таъсир кўрсатаётгани билан изоҳланади. 14 апрелидан 21 апрелига қадар ушбу маҳсулотнинг ўртача улгуржи нархи 1 килограмм учун 6000 дан 5000 сўмга пасайган. Шу билан бирга, ўтган йилги пиёзнинг ўртача улгуржи нархи ўтган йилнинг шу санасига нисбатан қарийб бир ярим баробар юқори.
Ўзбекистонда ўтган йилги ҳосил пиёзининг амалдаги улгуржи нархлари EastFruit мева-сабзавот маҳсулотларининг улгуржи нархларини ҳафталик мониторинг қилиб борадиган мамлакатлар орасида энг паст кўрсаткич ҳисобланади. 21 апрель ҳолатига кўра, минтақа мамлакатларида ўтган йилги пиёзнинг ўртача улгуржи нархи (1 килограмм учун АҚШ долларида): Ўзбекистон – 0,44 доллар; Тожикистон — 0,60 доллар; Молдова — 0,83 доллар; Польша — 0,83 доллар; Грузия — 0,99 доллар; Украина — 1,15 доллар.
Пиёз нархининг кескин ўсиши, аҳолининг ички истеъмол талабини қондириш ҳамда озиқ-овқат хавфсизлигини таъминлаш мақсадида ҳукумат топшириғи билан 1 январдан пиёз экспортига вақтинча чеклов ўрнатилганди. Ушбу чеклов 4 ой амал қилиши белгиланганди Ўзбекистонда 15 мартдан пиёз экспортига қўйилган вақтинчалик чеклов бекор қилинди. Маълумот учун, Ўзбекистондан ташқари, Қозоғистон, Тожикистон ва Қирғизистонда ҳам пиёз экспорти чекланганди. Қирғизистон Марказий Осиёда пиёз экспортига қўйилган тақиқни муддатидан олдин (3 мартдан) бекор қилган биринчи давлат бўлди.
Изоҳ (0)