Мудофаа вазирлигига қарашли ҳарбий қисм ва муассасаларида тантанали равишда ҳарбий хизматга янги чақирилган муддатли ҳарбий хизматчиларни Ватанга қасамёд келтириш маросимлари ўтказилди. Бу ҳақда вазирлик матбуот хизмати хабар берди.
Маълум қилинишича, Тошкент шаҳридаги “Ватанга қасамёд” мажмуасида ўтказилган маросимда мудофаа вазирининг биринчи ўринбосари, Қуролли Кучлар Бош штаби бошлиғи генерал майор Шуҳрат Холмуҳамедов йиғилганлар эътиборига мудофаа вазирининг аскарларга табригини ўқиб эшиттирган.
Шунингдек, Мудофаа вазирлиги ҳузуридаги Жамоатчилик кенгаши аъзолари, давлат ва жамоат ташкилотлари вакиллари, ота-оналар юрт осойишталиги йўлида хизмат қилишга бел боғлаган ўғлонларга ўзларининг самимий тилакларини билдирган.
“Бу каби тантанали маросимлар бугун барча ҳарбий округлар, ҳарбий қисм ва муассасаларда ўтказилди. Жойлардаги маросимларда Мудофаа вазирлиги, ҳарбий округлар ва ҳарбий қисмларнинг масъул офицерлари ҳар бир юрт ўғлонига муддатли ҳарбий хизмат давомида улкан зафарлар тилади”, — дейилади хабарда.
Асосий тадбирдан сўнг, ҳарбий хизматчилар томонидан кўргазмали қўл жанги ва жанговар чиқишлар, концерт дастурлари намойиш этилган.
Ватанга қасамёд нима?
Ўзбекистон президенти 2019 йилда “Хавфсизлик ва мудофаа соҳасидаги қонун ҳужжатлари такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги қонунни имзолаган эди.
Қонун билан “Умумий ҳарбий мажбурият ва ҳарбий хизмат тўғрисида”ги қонунига қуйидаги ўзгартиш ва қўшимчалар киритилди:
3-модда (Умумий ҳарбий мажбурият ва Ҳарбий қасамёд):
- номидаги “Ҳарбий қасамёд” деган сўзлар “Ватанга қасамёд” деган сўзлар билан алмаштирилди;
олтинчи қисми қуйидаги таҳрирда баён этилди:
- Ҳарбий хизматга биринчи марта чақирилган ёки ихтиёрий равишда (контракт бўйича) кирган фуқаролар Ўзбекистон Республикаси давлат байроғи олдида қуйидаги мазмунда ватанга қасамёд қабул қилади.
Изоҳ (0)