Жиззах вилоятида давлат хизматчиси фаолиятига қаршилик кўрсатиб, унга тан жароҳати етказган браконьерга нисбатан жиноят иши қўзғатилди. Бу ҳақда Бош прокуратура ҳузуридаги департамент хабар берди.
Маълум қилинишича, департаментнинг Айдар-Арнасой кўллар тизими ресурслардан фойдаланиш соҳасида иқтисодий ҳуқуқбузарликларга қарши курашиш бўлими томонидан Табиат ресурслари вазирлигининг Айдар-Арнасой кўллар тизими бўлими ходимлари билан ҳамкорликда тунги вақтда тезкор тадбир ўтказилди. Тадбирда Арнасой туманида яшовчи К.С. ва бошқалар электр қармоқларидан фойдаланган ҳолда ноқонуний балиқ овлаётгани аниқланган.
К.С. хизмат вазифасини бажараётган ходимларнинг қонуний талабларини бажармасдан, уларга фаол қаршилик кўрсатиб, ноқонуний овлаган балиқлари ва бошқа ашёвий далилларни йўқ қилиш мақсадида ўзининг Nexia-3 русумли автотранспорт воситасини департамент бўлим бошлиғи П.О.нинг устига ҳайдаб, унинг ҳаёти ва соғлиғига хавф туғдириш орқали тан жароҳати етказган.
Мазкур ҳолат юзасидан Фориш туман прокуратураси томонидан Жиноят кодексининг 219-моддаси (Ҳокимият вакилига ёки фуқаровий бурчини бажараётган шахсга қаршилик кўрсатиш) билан жиноят иши қўзғатилиб, тергов ҳаракатлари ўтказилмоқда.
Ўзбекистонда балиқ овлашда браконьерликка қарши назорат
Бош прокуратура “Ўзбекистон Республикаси табиий сув ҳавзаларида балиқ овлаш қоидаларини тасдиқлаш тўғрисида”ги Вазирлар Маҳкамаси қарори лойиҳасини муҳокамага қўйган.
Ҳужжат билан Ўзбекистон табиий сув ҳавзаларида балиқ овлаш қоидалари иловага мувофиқ тасдиқланиб, ушбу қарор 2023 йил 1 июлдан бошлаб амалга киритилиши кутилмоқда.
Балиқларни тутиш учун тўловлар миқдорига кўра, ноёб ва йўқ бўлиб кетиш хавфи остидаги турлар, Ўзбекистон “Қизил китоби”га киритилган балиқларни илмий, тиббий мақсадларда овлаш учун БҲМга 3 баробари миқдорида тўловни амалга ошириш лозим бўлади. Хорижий фуқаролар ва юридик шахслар учун эса мазкур тўлов (1 донаси учун) 500 долларни ташкил этади.
Изоҳ (0)