Ўзбекистон шаҳарларини ривожлантириш учун 59 млн доллар йўналтирилади

Президентнинг “Осиё тараққиёт банки иштирокида “Ўзбекистон Республикасида шаҳарларни комплекс ривожлантириш дастури” лойиҳасини амалга ошириш чора-тадбирлари тўғрисида” қарори қабул қилинди, деб хабар беради Норма.

“Ўзбекистон Республикасида шаҳарларни комплекс ривожлантириш дастури” лойиҳасини амалга ошириш учун Осиё тараққиёт банки (ОТБ) билан 59 миллион доллар миқдоридаги қарз битимини имзолаш бўйича дастлабки келишувга эришилган.

Бунда Ўзбекистоннинг халқаро шартномалари бўйича халқаро молия институтлари ва хорижий ҳукумат молия ташкилотларининг маблағлари (қарзлари, кредитлари) ҳисобидан амалга ошириладиган лойиҳалар доирасида олинадиган товарлар божхона божидан озод қилинган.

Лойиҳани амалга ошириш муддати 5 йилни (2023—2027 йиллар) ташкил этади. Инвестициялар, саноат ва савдо вазирлиги лойиҳанинг ўз вақтида амалга оширилиши, ОТБ қарзларидан мақсадли ва самарали фойдаланилиши учун масъул бўлган ижро этувчи орган сифатида белгиланган.

Ҳужжат билан қуйидагилар тасдиқланди:

• “Ўзбекистон Республикасида шаҳарларни комплекс ривожлантириш дастури” лойиҳасини техник-иқтисодий асослашнинг асосий техник-иқтисодий параметрлари;
• “Ўзбекистон Республикасида шаҳарларни комплекс ривожлантириш дастури” лойиҳаси бўйича Осиё тараққиёт банки қарзини сўндириш ва фоизларни тўлашнинг прогноз жадвали;
• “Ўзбекистон Республикасида шаҳарларни комплекс ривожлантириш дастури” лойиҳаси доирасида Осиё тараққиёт банки қарзини 2028 йилдан бошлаб қоплаш юзасидан улушлар тақсимотининг прогноз жадвали;
• “Ўзбекистон Республикасида шаҳарларни комплекс ривожлантириш дастури” лойиҳаси 2-компоненти доирасида Осиё тараққиёт банки қарзи бўйича хизмат кўрсатиш харажатларини қоплаш юзасидан улушлар тақсимотининг прогнози.

Ҳужжат Қонун ҳужжатлари маълумотлари миллий базасида эълон қилинган ва 19 апрелдан кучга кирди.

Февраль ойида Осиё тараққиёт банки Ўзбекистонда иқтисодий бошқарувни яхшилаш учун 150 млн АҚШ доллари миқдорида қарз ва 400 минг АҚШ доллари миқдорида грант ажратилишини маъқуллаганди. Шунингдек, Ислом тараққиёт банки Ўзбекистонда мактаблар қуриш ва таъмирлашга маблағ ажратиши, Ўзбекистон ва Жаҳон банки қўшма лойиҳалари портфели 10 миллиард доллардан ошгани, ЕИБ Ўзбекистоннинг қуёш электр станцияларини қуриш учун 83,6 миллион доллар ажратиши тўғрисида хабар берилганди.