Ўзбекистонда дарахт кесганлик, унга зиён етказганлик учун жазо чоралари кучайтирилмоқда. Бу ҳақда 20 апрель куни бўлиб ўтган экоакция аввалида табиат ресурслари вазири Азиз Абдуҳакимов айтиб ўтди, деб хабар бермоқда “Дарё” мухбири.
Вазирнинг айтишича, Қонунчилик палатасига Маъмурий жавобгарлик тўғрисидаги кодексга ўзгартиришлар киритиш ҳақида таклиф киритилган.
“Ҳозирда фуқаролар, тадбиркорларимизни огоҳлантириш билан чекланмоқдамиз. Жазо чоралари ҳам жуда кучсиз — 300 минг сўмдан 1,5 миллион сўмгача жарима. Албатта, бу таъсирчан чора эмас. Шунинг учун ҳозир биз Маъмурий жавобгарлик тўғрисидаги кодексга тегишли ўзгартиришлар киритишни таклиф этдик. Шу ўзгаришлар кучга киргандан кейин молиявий санкциялар ҳам каррасига кўпаяди”, — деди Азиз Абдуҳакимов.
Унинг таъкидлашича, янги ўзгаришлар билан юридик шахсларга ҳам жазо чоралари қўлланади.
“Кўпинча мансабдор шахсларга, фуқароларга қўлланади ҳозирги жазо. Лекин юридик шахсларга қўлланмаяпти молиявий санкциялар. Биз таклиф этаётган ўзгаришлар қабул қилинса, юридик шахсларга ҳам оғир-оғир санкциялар қўлланади. Бундан ташқари, ўсимлик ва ҳайвонот дунёсига келтириладиган зарар ҳам ўта оғир жиноят категориясига ўтказилмоқда. Бу дегани масъулият ҳам, жазо ҳам каррасига ошади”, — дейди у.
Азиз Абдуҳакимов 1 апрель куни бўлиб ўтган тадбирда ҳам атроф-муҳит, флора ва фаунани асраш мақсадида ҳуқуқбузарларга нисбатан катта миқдордаги жарима жазоларини қўллаш, ҳаттоки молиявий санкциялар эълон қилиш масалаларини қонунчиликка киритиш таклифлари ишлаб чиқилаётганини айтиб ўтган эди.
Изоҳ (0)