Сенатда “Манфаатлар тўқнашуви тўғрисида”ги қонун муҳокама қилинди

Сенатнинг Суд-ҳуқуқ масалалари ва коррупцияга қарши курашиш қўмитаси томонидан “Манфаатлар тўқнашуви тўғрисида”ги қонун муҳокама қилинди. Бу ҳақда парламент юқори палатаси ахборот хизмати хабар берди.

Хабарга кўра, йиғилишда бугунги кунга қадар давлат органлари ва ташкилотларида манфаатлар тўқнашувини аниқлаш, олдини олиш ва назорат қилишнинг аниқ механизмлари яратилмагани айтилган.

“Қонунчиликда манфаатлар тўқнашувини ҳуқуқий жиҳатдан тартибга солинмагани амалиётда бир қатор муаммоларни келтириб чиқариши билан бирга, коррупциявий ҳолатларга шароит яратиб бермоқда. Мазкур қонун юқорида қайд этилган муаммоларни бартараф этиш билан бирга, юзага келиши мумкин бўлган манфаатлар тўқнашувини олдиндан аниқлаб, тегишли чора-тадбирларни белгилаш имконини яратади”, — дейилади хабарда.

Маълум қилинишича, қонун билан манфаатлар тўқнашуви оқибатида етказилган зарарни қоплашнинг ҳам аниқ механизмлари белгилаб берилмоқда.

Қонун билан давлат ташкилоти фаолиятида манфаатлар тўқнашувини тартибга солишда ваколатли органлар, яъни Коррупцияга қарши курашиш агентлиги, давлат ташкилотларининг одоб-ахлоқ комиссияси, кадрлар бўлинмалари ва коррупцияга қарши ички назорат тузилмаларининг вазифалари белгиланмоқда.

Шу билан бирга, давлат ташкилоти ходими томонидан манфаатлар тўқнашуви ҳақида мавжуд манфаатлар тўқнашувидан хабардор қилиш ҳамда манфаатлар тўқнашуви тўғрисидаги маълумотларни декларация қилиш орқали маълум қилиши назарда тутилмоқда.

Манфаатлар тўқнашувини дастлабки босқичда аниқлаш ҳамда уни вақтида тартибга солиш мақсадида давлат ташкилоти ходимининг яқин қариндошлари ва унга алоқадор бўлган шахслар томонидан мазкур ходимнинг меҳнат қилаётган ташкилоти билан ҳуқуқий муносабатга киришаётганда манфаатлар тўқнашуви тўғрисида ёзма ёки электрон шаклда хабар бериш лозимлиги белгиланмоқда.

Давлат органи ходимларининг манфаатлар тўқнашуви ҳақида хабар бермагани, мансабдор шахсларнинг ушбу вазиятни тартибга солмагани учун жавобгарлик мустаҳкамланмоқда.

Йиғилишда қонун манфаатлар тўқнашувини тартибга солишнинг аниқ механизмини белгилаб, мазкур йўналишда давлат назоратининг ўрнатилишига ва коррупциянинг олдини олишга хизмат қилиши айтилган. Қонун бўйича келгусида муҳокамаларни давом эттиришга келишиб олинган.