Украина президенти Владимир Зеленский Волин вилоятига иш сафарини амалга ошириб, Украина, Польша ва Беларусь чегаралари туташадиган чегара участкасига ташриф буюрди. Бу ҳақда Украина президенти матбуот хизмати хабар берди.
Маълум қилинишича, Зеленский давлат чегарасини тартибга солиш билан танишган. Ҳудудда муҳандислик тўсиқлари, истеҳкомлар ва масофавий видео кузатув тизимларини ўрнатиш кўпаймоқда. Ушбу чоралар Беларусь ҳудудидан Россия босқинини қайтариш учун зарурлиги айтилмоқда.
Чегарачилар Зеленскийга 2022 йил бошидан буён Волин вилояти доирасида Беларусь билан чегарани мустаҳкамлаш бўйича олиб борилган ишларни кўрсатган. Президент чегарадаги кузатув пунктини, дронларни аниқлаш тизимларини кўздан кечирган.
“Бахмутдаги ҳимоянгиз учун раҳмат айтмоқчиман. Бахмутни қанчалик ушлаб турганингизни биламан. Бизда шундай кучли чегарачилар борлигидан фахрланамиз. Давлатимизни ҳимоя қилишда бизда бор куч, адолат ва ғазабни сақлаб қолишингизни тилайман. Барчага фақат ғалаба тилайман”, — деган Зеленский.
Шунингдек, Украина президенти Волин вилоятида ҳам йиғилиш ўтказган. Ҳарбий масалалардан ташқари, ижтимоий-иқтисодий ва бугунги кундаги вазият муҳокама қилинган.
Путиннинг босиб олинган Украина ҳудудларига ташрифи
18 апрель куни Россия президенти Владимир Путин Херсон ва Луганскка ташриф буюргани хабар қилинди. Ташрифда Россия раҳбари ҳарбий ҳисоботларни тинглаган, шунингдек, ҳарбий хизматчиларни Пасха байрами билан табриклаган ва уларга совға берган. Ижтимоий тармоқларда Путиннинг ташрифидан видеолар эълон қилинган.
Шу куни Украина президенти Владимир Зеленский Украина қуролли кучларининг Донецк вилояти Авдеевкадаги олдинги позицияларига ташриф буюрди.
19 март куни Путин Мариуполга вертолётда ташриф буюриб, шундан сўнг у шаҳарнинг бир қанча туманларини машинада айланиб чиққанди. Зеленский офиси ташрифга муносабат билдириб, “жиноятчи ҳар доим жиноят содир бўлган жойга интилишини” қайд этганди.
Кремль матбуот котиби Дмитрий Песков эса Россия президенти рус ҳарбийлари томонидан босиб олинган Мариуполга унинг қайта тикланганига ишонч ҳосил қилиш учун борганини айтган.
Изоҳ (0)