АҚШ президенти Жо Байден ва рафиқаси Жилл Байден қўшма солиқ декларациясини эълон қилди, унга кўра оиланинг йиллик даромади 579,5 минг долларни ташкил этмоқда, шундан 169,8 минг доллари 2022 йилда федерал солиқларни тўлашга сарфланган. Тегишли баёнот ва ҳужжатлар 18 апрель куни Оқ уй матбуот хизмати томонидан тарқатилди.
Ҳисоботда қайд этилишича, даромад солиғи ставкаси 23,8 фоизни ташкил қилган. Шунингдек, Байден оиласи Делавер штатида 29 минг доллардан кўпроқ солиқ тўлаган, у ерда президент ва рафиқасининг оилавий уйи бор.
Жилл Байден Виржиния штатида ҳам солиққа 3 100 доллар тўлаган. Бундан ташқари, президент ва биринчи хоним 20,2 минг долларга яқин маблағни (даромадининг 3,5 фоизи) хайрия ишларига ўтказган. Маблағлар 20 та хайрия ташкилотига юборилган.
2021 йилда Байден оиласининг йиллик даромади 610 минг долларни ташкил этганди.
АҚШ вице-президенти Камала Харрис ва унинг турмуш ўртоғи Дуглас Эмхофф ҳам солиқ ҳужжатларини эълон қилди. Уларнинг умумий даромади қарийб 457 минг долларни ташкил этган бўлиб, шундан 93,5 минг доллардан ортиғи даромад солиғига тўланган. Бу кўрсаткич оила даромадининг 20,5 фоизини ташкил этади. Улар, шунингдек, Калифорния штатида 17 600 доллар, Эмхоффнинг ўзи эса Колумбия пойтахт округида қўшимча 9 600 доллар солиқ тўлаган. Жуфтлик 2022 йилда хайрия учун 23 минг доллар сарфлаган.
Изоҳ (0)