Бразилия президенти Лула да Сильва Россиянинг Украина ҳудудий яхлитлигини бузаётганини қоралади. Бу ҳақда Reuters хабар берди.
Аввалроқ Қрим ярим оролини Россияга бериш кераклиги ҳақида гапирган Лула да Сильва Украинадаги урушни тугатишда воситачилик қилишни таклиф қилди. У Руминия президенти Клаус Ёҳаннис билан кечки зиёфатда сўзга чиқиб, “Россия ва Украина ўртасида тинчлик ўрнатилишига ёрдам бериш” учун бир гуруҳ нейтрал давлатлар бирлашиши кераклигини таъкидлади.
Бунгача Бразилия президенти Ғарб давлатлари Украинага қурол етказиб бериш орқали урушни чўзаётгани ҳақидаги гапирганди. Шундан сўнг Ғарб иттифоқчилари Лула да Сильвани танқид қилганди.
Оқ уй матбуот котиби да Сильвани “фактларга эътибор бермай, Россия ва Хитой пропагандасини такрорлашда” айблаган. Оқ уй эса “Луланинг овоз оҳанги нейтрал эмаслигини билдирган”.
Бразилия президентининг Қримни Россияга бериш таклифи
Бразилия президенти Лула да Сильва Россия президенти Украинани эгаллаб ололмаслиги, эҳтимол, “Қримни муҳокама қилиш арзирли” эканини айтганди. У бу фикрни Хитой етакчиси билан ҳам муҳокама қилмоқчилигини ва бу муваффақиятли эканига ишонч билдирган.
Бразилия президенти Зеленскийнинг “истакларини бажариш” мумкин эмаслигини ҳам қўшимча қилган. Украина Ташқи ишлар вазирлиги эса Лула да Сильванинг Қримни Россияга бериш таклифига жавобан Украина ҳудудини савдолашмаслигини таъкидлаган.
Украинанинг позицияси ўзгармаган — тинчликни тиклаш бўйича ҳар қандай воситачилик ҳаракатлари БМТ низоми тамойилларига мувофиқ суверенитетни ҳурмат қилиш ва мамлакат ҳудудий яхлитлигини тўлиқ тиклашга асосланиши керак.
Изоҳ (0)