Агар Жанубий Корея Украинага қурол етказиб беришни бошласа, Шимолий Корея энг сўнгги русумдаги рус қуролларини олиши мумкин. Бу ҳақда Россия собиқ президенти, амалдаги Хавфсизлик кенгаши раисининг биринчи ўринбосари Дмитрий Медведев ўзининг Telegram каналида ёзди.
“Жанубий Корея президенти Юн Сок Ёль бу давлат Киев режимини қурол-яроғ билан таъминлашга тайёр эканини айтди”, — деб ёзди Медведев Жанубий Корея президентининг Украинага қурол етказиб беришни истисно этмагани ҳақидаги баёнотини эслатиб. “Қизиқ, бу мамлакат аҳолиси ўзининг энг яқин қўшниси Шимолий Кореядаги ҳамкорларимиз қўлида Россиянинг энг сўнгги русумдаги қуролларини кўрганида нима деркин?” — қўшимча қилди Медведев.
Жанубий Корея Россия босқини бошланганидан кўп ўтмай Украинани қўллаб-қувватлашга киришган эди, бироқ ҳозирча у фақат гуманитар ва ноҳарбий ёрдам: дори-дармонлар, чодирлар, кўрпа-тўшаклар, ўқ ўтказмайдиган дубулғалар ва бошқа ҳимоя воситалари билан чекланмоқда.
Март ойи бошида Жанубий Корея бош вазири Хан Док Су Сеул ҳали Киевга қирғин қуроллари етказиб бермоқчи эмаслигини тасдиқлади. Шу билан бирга, апрель ойи ўрталарида Жанубий Корея президенти Юн Сок Ёль АҚШга ташрифи олдидан Reuters агентлигига берган интервьюсида, агар Украина аҳолиси “кенг кўламли ҳужум”га учраса, Сеул Киевга қурол етказиб бериши мумкинлигини айтди.
Унинг қўшимча қилишича, уруш зонасидаги вазият ва можаро томонлари билан муносабатларнинг ривожланишини инобатга олган ҳолда, Жанубий Корея расмийлари “энг мақбул чоралар”ни кўради.
Изоҳ (0)