Карло Анчелотти қаторасига 2 йилдан бери “Реал” бошқаруви остида апрель ойида “Челси”ни Чемпионлар Лигасидан чиқариб юбормоқда. “Қироллик клуби” бу сафар ҳам муаммолар қуршовида ётган лондонликлар устидан ишончли ғалабага эришди.
“Челси” Анчелотти учун бегона жамоа эмаслиги аниқ. Карлога Лондонда “ўзимизники” деб қарашади ва у Абрамович давридаги энг севимли мураббийлардан бири сифатида эсда қолган.
Абрамович билан махфий учрашувлар ва мағлубиятдан кейин юборилган “?” смсга берилган “!” жавоб
Карло Анчелотти “Челси” билан муносабатларини Роман Абрамович билан бўлган махфий учрашувлар билан бошлаган. Учрашувлар иккала томонда ҳам яхши таассуротлар қолдирганига қарамай, 2008 йилда Лондон клуби эгалари Луис Фелипе Сколари вариантини танлади. Аммо бразилиялик ярим йилдан сўнг истеъфога чиқарилди ва “Челси” яна Анчелотти вариантига қайтди. Анчелотти “Милан”даги фаолиятини худди аллақачон “Челси”ни бошқараётгандек якунлади. У мунтазам равишда “Челси”нинг ўйинларини кўриб борди ва ўзи учун қайдлар белгилади.
Абрамович билан бўлган муносабатлар Анчелотти учун асосий чақирувлардан бири бўлди. Анчелотти ўзаро муносабатларни ёдга олганга кўпинча осон бўлмагани ҳақида гапиради. Масалан, мавсумдаги биринчи мағлубиятнинг (“Уиган”га қарши ўйиндаги 1:3) эртасига Абрамович машғулот базасига ташриф буюриб, тушунтириш беришни сўраган. “Бу мен учун ўзаро алоқаларнинг янги босқичи эди. Ҳатто Берлускони ҳам бунчалик талабчан бўлмаган”, — деганди Анчелотти.
Абрамович норозилик сифатида Анчелоттига фақат сўроқ белгиси ёзилган смслар юборган. Карло ҳам қисқа тарзда фақат ундов белгиси ёзилган хабар билан жавоб қайтарган. “Агрессияга агрессия билан жавоб қайтармасликка қарор қилгандим”, — дея изоҳлаган Анчелотти.
“Челси” Анчелотти даврида ажойиб ҳолатда эди. 2009/10 йилги мавсумда жамоа биринчи марта олтин дубль (чемпионлик ва Англия Кубоги) қайд этди, 103 та гол урди, Лэмпард ва Дрогба шахсий кўрсаткичлар бўйича рекордлар ўрнатди. Жамоа нинг ўртача ёши 29 ёш-у 75 кунлик эди ва АПЛ чемпионига айланган энг кекса клуб бўлганди.
Иккинчи мавсум бошқача бўлди. “Челси” фақат “Манчестер Юнайтед”ни ўзидан олдинга ўтказиб юборди ва 2-ўринни олди. Бироқ бу Абрамовични қониқтирмади.
Анчелотти муроса қилишни яхши кўрарди. Айнан шу нарса унинг кетишига сабаб бўлди
Анчелотти ўзининг Англияга сафарини чақирувдек кўрган — бунгача Италиядан бошқа давлатда ишламаган эди. У клуб томонидан инглиз тили курсларига юборилган ва ҳафталик интенсив курсларда ўз ёрдамчиси Бруно Демичелис билан бир кунда 12 соатдан шуғулланган. Маълумот учун, Анчелотти “Милан”дан фақат Демичелисни Англияга олиб келганди. Штабнинг бошқа аъзолари маҳаллий мутахассислар эди.
Карло мослашишни ва муроса қилишни биладиган мураббий ҳисобланади. Айнан шунинг учун италияликлардан фақат Демичелис унинг штабидан ўрин олганди. Лекин у футболчилар билан ҳам яхши тил топишарди. Анчелотти ўша пайтданоқ футболчиларга эътибор қаратувчи етук мураббий эди. Бу умумий тилни топишга ва жамоанинг эркин бўлишига ёрдам берди.
Жон Терри италиялик мутахассиснинг эшита олиш қобилиятини мақтаганди.
“Карло жамоага келиб ‘Хўш, мана менинг йўлим. Бу жамоа учун ягона йўл бўлади, ёки мен бу ерда бўлмайман’, дейдиган мураббийлардан эмас. У дарҳол жамоанинг энг тажрибали футболчилари билан гаплашди. ‘Албатта, менда қандайдир режалар бор, лекин сўнгги йилларда кўп нарса ўргандингиз. Қарашларингизни ва қай тариқа бундай омадли бўганингизни мен билан ўртоқлашинг. Футболдан роҳат олиш учун қандай йўл тутиш керак?’, деди у.
Анчелотти ‘Милан’да ишлаган вақтда ўйинга бир неча кун қолганда тактикани танлашга ўрганиб қолган. Англияда эса бундай эмас ва у ҳаммасини эътиборга олди. Анчелотти ёндашувларни қориштирди, ўйиндан аввал тактикани муҳокама қиларди, таркибларни ўйиндан бир кун аввал ёки ўйин куни эълон қиларди. Гап шундаки, у ҳақиқатдан ҳам эшитарди. Яна шуни айтишим мумкинки, мен бундай ишлайдиган мураббийларни кўп кўрмаганман. Ҳозир ҳам фақатгина ўз маъқуллаб туриб оладиган мураббийлар кўп”.
Ҳақиқатдан ҳам бундай муносабат жамоанинг биринчи мавсумда олтин дубль қайд этишига сабаб бўлди, бироқ бир йилдан кейин жамоа мураббийсиз қолди. Жамоада иккита катта жанжал чиққан вақтда (Жон Терри ва Уэйн Брижнинг собиқ севгилиси, Эшли Коулнинг стажёр талабага ўқ узгани) мураббий жамоадаги ўзаро ишончни сақлаб қолди. Шу билан бирга раҳбарият Карлонинг футболчилар билан ўта дўстона муносабатда экани ва унинг бўш ёндашуви муаммолар келтириб чиқаради деган фикрда эди.
Кейинчалик Анчелотти жамоадан кетишига нима сабаб бўлганини таҳлил қилди.
Мени клубдаги вазиятни тинчлантириш, футболчилар билан бир-биримизни тушунишга қодирлигим учун ёллашади. Бу менинг асосий қобилиятларимдан бири. Кейин эса хўжайинлар бошқа нарсани хоҳлайди ва муносабатлар ёмонлашишни бошлайди. Аввалига улар меҳрибон ва хотиржам бўлишимни истайди. Кейин эса муаммонинг илк белгилари кўринишни бошлаганда айнан шуни сабаб қилиб кўрсатади. Агар ғалаба қозонсам хотиржамлигим сабаб, мағлубиятга учрасам ҳам бунга хотиржамлигим сабаб бўлади. Қандай қилиб булар бир хил бўлиши мумкин. “Челси”да мен шундай қопқонга тушиб қолдим.
Абрамович билан муносабатларнинг дарз кетиши 2010 йилнинг февралидаги икки мағлубиятдан кейин содир бўлди. “Челси” уч кун ичида аввал Чемпионлар Лигаси 1/8 финалида Жозе Моуриньо бошчилигидаги “Интер”га кейин эса АПЛ доирасида ўз уйида “Манчестер Сити”га 2:4 ҳисобида мағлуб бўлди. Абрамович бу мағлубиятларни чақмоқ зарбидек қабул қилди. “Манчестер Сити”га қарши ўйиндан кейин Абрамович тонги 9 да йиғилиш ўтказди ва нима бўлганини сўради. “Интер”дан қабул қилинган мағлубиятдан кейин эса футболчиларнинг олдида мураббий танлаган тактикани танқид қилди.
2011 йилда Чемпионлар Лигаси чорак финалида “Манчестер Юнайтед”дан учралган мағлубият “Челси” раҳбарлари учун якуний нуқта бўлди.
“Жавоб ўйини арафасида Абрамович футболчиларга юзланиб, улар ғалаба қозониши кераклигини, акс ҳолда жамоани катта ўзгаришлар кутаётганини айтди. У менга, агар ютқазсак, ишга қайтиб келмаслигимни айтди. Биз ютқаздик, ўзимни тирик мурдадек ҳис қилсам ҳам қайтиб келдим”, — дея эсга олади италиялик мураббий.
Мураббий охирги ўйиндан кейин дарҳол “Гудиссон Парк” коридорида истеъфога чиқарилган
Саккиз йил ўтганидан кейин у “Эвертон” мураббийи этиб тайинланди ва тақдимот маросимида бу воқеа ҳақида ҳазил қилди. “Ўйлашимча бу ерга ‘Шу ерда Анчелотти истеъфога чиқарилган’ деган ёзув ўрнатилиши керак”, — деганди италиялик мутахассис.
“Эвертон”га тегишли “Гудиссон Парк” стадиони 2011 йилда АПЛ тарихидаги энг совуқ истеъфолардан бирини кўрган. Мавсумнинг сўнгги учрашувида “Челси” “Эвертон”га 0:1 ҳисобида мағлуб бўлган. Анчелотти журналистларга интервью бераётган вақтда пресс-зонада уни жамоанинг бошқарувчи директори Рон Гурлей кутаётганди. Анчелотти интервью беришни тугатган заҳоти Гурлей унга ишдан бўшатилганини айтган.
Орадан анча йил ўтиб “Реал Мадрид” мураббийи сифатида фаолият олиб бораётган мутахассис қаторасига иккинчи йил собиқ жамоасини мусобақадан чиқариб юбормоқда.
Изоҳ (0)