Сирдарёда барпо этиладиган, лойиҳа қиймати 50 миллион доллар бўлган агрологистика маркази Хитой томонидан молиялаштирилади. Бу ҳақда Қишлоқ хўжалиги вазирлиги ахборот хизмати хабар берди.
Хабарга кўра, қишлоқ хўжалиги вазири Азиз Воитов Хитойнинг Citic group компанияси қишлоқ хўжалиги департаменти бош директорининг ўринбосари Ибо Ванг бошчилигидаги делегация билан учрашди. Унда Ховос туманида қиймати 50 миллион АҚШ доллари бўлган Агрологистик парк қуриш лойиҳаси муҳокама қилинди.
Умумий 32 гектар майдонни ўз ичига олган мазкур лойиҳага кўра, 50 минг тонна сиғимга эга музлаткичли омбор, 300 минг тонна қишлоқ хўжалиги маҳсулоти товар айланмаси, жумладан, саралаш, қайта ишлаш, сақлаш, совитиш, қадоқлаш бўлимлари, шунингдек, офислар, камида 200 хонали меҳмонхона, божхона, автопарк, фитосанитария ва ветеринария текшируви пунктлари ва бошқа объектлар қурилиши назарда тутилган.
Қайд этилишича, бу йирик логистика маркази мамлакатни Қозоғистон, Тожикистон, Хитой ва Афғонистон билан боғлайди.
Изоҳ (0)