Америкалик бизнесмен Илон Маск сунъий интеллект (AI) соҳасида ишлайдиган Х.AI компаниясини яратди. Бу ҳақда The Wall Street Journal (WSJ) хабар бермоқда.
Ҳужжатларга кўра, янги компания Невада штатида рўйхатдан ўтган. Илон Маск унинг ягона директори, котиби эса ўтган ой ишга олинган молия директори Жаред Бирчалл.
Маск Alphabet компаниясининг DeepMind AI лабораторияси олими Игор Бабушкинни ҳам ишга олган. У, шунингдек, GPTchat чат-ботини ишлаб чиққан OpenAI компанияси ходимларини ўз компаниясига таклиф қилмоқчи бўлган, бироқ бунга эриша олмаган.
Аввалроқ WSJ Илон Маск OpenAI билан рақобатлашадиган сунъий интеллект стартапини ишга туширишни режалаштираётгани ҳақида хабар берганди.
Нашрнинг ёзишича, Илон Маскнинг бошқа компаниялари Tesla ва Twitter ҳозирда жамоа йиғиб, ўз инвесторлари билан стартап сармоясини жалб қилиш бўйича музокаралар олиб бормоқда.
Март ойида Маск сунъий интеллект соҳасидаги айрим мутахассислар билан биргаликда сунъий интеллектни тартибга солиш бўйича қатъий қоидаларни ўрнатиш мақсадида у бўйича ишларни тўхтатиб туришга чақирувчи очиқ хатни имзолаган эди. Мутахассисларнинг фикрича, бундай ўзгаришлар инсоният учун хавф туғдириши мумкин.
Изоҳ (0)