Наманган шаҳрида оҳак пишириш хўжалиги 4 миллиард сўмдан ортиқ табиий газдан ноқонуний фойдаланиб келгани аниқланди.
“Ҳудудгаз Наманган” газ таъминоти филиалининг хабар қилишича, Давлатобод тумани газ таъминоти бўлими мутахассислари томонидан назорат тадбирлари ўтказилди. Тадбир давомида туманда газ таъминоти тизимига ноқонуний уланган оҳак пишириш хўжалиги аниқланган.
“Nam Smart Servis“ МЧЖга тегишли бўлган мазкур корхона тармоққа яширин тарзда уланиб ноқонуний равишда оҳак пишириш учун табиий газдан фойдаланиб келган.
Дастлабки ҳисоб-китобларга кўра корхона 4 миллиард сўмдан ортиқ табиий газ истеъмол қилгани аниқланган. Ҳолат юзасидан тўпланган ҳужжатлар маъмурий тарзда чора кўриш учун ҳуқуқни муҳофаза қилиш органларига тақдим этилган.
Тошкент вилояти Янгийўл тумани газ таъминоти бўлими мутахассислари томонидан ўтказилган назорат тадбирлари давомида туманда газ таъминоти тизимига ноқонуний уланган автомобилларга газ тўлдириш компрессор шохобчаси аниқланган.
“Нурли йўл газ сервис” МЧЖга қарашли бўлган мазкур АГТКШ компрессорларини газ қувурига ноқонуний улаган ҳолда табиий газдан фойдаланиб келишидан ташқари, АГТКШ учун алоҳида ўрнатилган электрон газ ҳисоблаш ускунасига ҳам ташқи тасир кўрсатилгани аниқланган.
Дастлабки ҳисоб-китобларга кўра шохобча 396 миллион сўмлик табиий газ истеъмол қилган. Ҳолат юзасидан тўпланган ҳужжатлар маъмурий тарзда чора кўриш учун ҳуқуқни муҳофаза қилиш органларига тақдим этилган.
Изоҳ (0)