Фарғона вилояти Ўзбекистон тумани ҳокимлигида ишловчи шахс пора олаётган вақтда ушланди. Бу ҳақда Ички ишлар вазирлиги ахборот хизмати хабар берди.
Маълум бўлишича, мутасадди шахс ҳокимият балансида бўлган қишлоқ хўжалиги мақсадлари учун мўлжалланган захира ерларни сотишга уринаётгани тўғрисида маълумот олинган.
12 апрель куни Фарғона вилояти ИИБ ТҚХ ва Иқтисодий жиноятларга қарши курашиш департаментининг вилоят бошқармаси ходимлари билан ҳамкорликда тезкор-қидирув тадбири ўтказилган.
Ер назорати инспектори ҳокимият балансида бўлган қишлоқ хўжалиги мақсадлари учун мўлжалланган захира ерлардан 3 гектарини очиқ электрон платформаси орқали ютиб бериш эвазига тадбирга жалб этилган махсус харидордан 4 минг доллар миқдоридаги пулларни олаётган вақтида қўлга олиниб, тегишли тартибда ҳужжатлар расмийлаштирилган.
Тўпланган ҳужжатларга асосан, Иқтисодий жиноятларга қарши курашиш департаментининг Фарғона вилоят бошқармаси томонидан Жиноят кодексининг 168-моддаси (фирибгарлик) 3-қисми “а” банди ва 25-модда (жиноятга тайёргарлик кўриш ва жиноят содир этишга суиқасд қилиш) орқали 211-моддаси (пора бериш) билан жиноят иши қўзғатилиб, дастлабки тергов ҳаракатлари олиб борилмоқда.
Изоҳ (0)