Афғонистонда Қозоғистон савдо уйи очилади, унинг бош офиси мамлакат ғарбидаги Ҳирот шаҳрида жойлашади. Бу ҳақда “Дарё”нинг Афғонистондаги мухбири хабар берди.
Савдо уйи очилиши Кобулда бўлиб ўтган Қозоғистон—Афғонистон бизнес-форумида эълон қилинди. Forumда Қозоғистон бош вазирининг ўринбосари, Савдо ва интеграция вазири Серик Жумангарин ҳамда озиқ-овқат соҳасидаги 18 нафар қозоғистонлик тадбиркор-экспортчилари иштирок этди.
Савдо уйи Қозоғистон ва Афғонистонда “B2B” (бизнесга бизнес) форматидаги тадбирларни ташкил этишни таъминловчи икки давлат ишбилармон доиралари ўртасидаги майдонга айланиши кутилмоқда.
16 апрель куни Қозоғистон делегацияси Кобул аэропортида республиканинг инсонпарварлик ёрдамини “Толибон” савдо вазири Нуруддин Азизийга топширган.
Қозоғистон Ташқи ишлар вазирлиги матбуот котиби мамлакат Афғонистондаги савдо уйи орқали ун, буғдой, темирйўл техник жиҳозлари ва ёғ етказиб беришини маълум қилди. Савдо уйи айнан қачон очилиши ҳақида маълумот берилмаган.
Ўз навбатида, Қозоғистон делегацияси билан учрашувда иштирок этган “Толибон” ҳукуматидаги иқтисодий масалалар бўйича бош вазир ўринбосари мулла Абдулғани Барадар томонлар Остонада Афғонистон дипломатик миссияси фаолиятини қайта тиклашга келишиб олганини маълум қилди. Унинг таъкидлашича, Қозоғистон томони “Толибон”нинг элчихонада ишлаш учун юборган дипломатларини қабул қилишга ваъда берган. Қозоғистон бу маълумотга ҳали расман изоҳ бермади.
“Толибон” бир ярим йилдан бери Афғонистонда ҳукумат тепасида турганига қарамай, уларни дунёнинг ҳеч бир давлати тан олмаган. Бироқ бугунга қадар Афғонистоннинг Россия, Хитой, Туркманистон, Эрон ва Покистондаги элчихоналари “Толибонга” топширилган.
Бир неча кун аввал Хитойнинг “Гочин” компанияси вакиллари Кобулда “Толибон” расмийлари билан учрашувда Афғонистондаги литий захираларига 10 миллиард доллар сармоя киритмоқчи эканини маълум қилганди.
Изоҳ (0)