Индонезияда Ғарбий Папуа мустақиллиги учун курашаётган айирмачилар янги зеландиялик учувчи Филип Мертенсни қутқариш операциясини олиб бораётган олти нафар индонезиялик аскарни ўлдирди, деб хабар бермоқда Австралиянинг ABC телеканали маҳаллий ҳокимиятга таяниб.
Газетанинг ёзишича, 15 апрель куни айирмачилар Ндуга ҳудудидаги ҳарбий постга ҳужум қилган, у ерда 36 нафар Индонезия аскари бор эди. Журналистлар танишиб чиққан ҳарбий ҳисоботга кўра, тўққиз киши асирга олинган, 21 киши яширинган.
Индонезия Мудофаа вазирлиги вакили полковник Герман Таряман фақат бир аскар ҳалок бўлганини тасдиқлади. “Ҳалигача қанча ҳарбий ҳалок бўлгани ва яралангани маълум эмас. Қидирув ишларимиз давом этмоқда, аммо кучли ёмғир, туман ва алоқа йўқлиги қидирув ва эвакуацияни қийинлаштирди”, — деди Таряман ва ҳарбийлар 30 кишини қидираётганини қўшимча қилди.
CNN айирмачиларнинг хабарига таяниб, дам олиш кунлари ҳарбий постларга камида иккита ҳужум уюштирилгани, оқибатда 13 киши ҳалок бўлганини ёзмоқда. Шунингдек, Ғарбий Папуа озодлик армияси баёнотига кўра, асирга олинган тўққиз нафар индонезиялик аскар ўлдирилган.
Айирмачилар ҳарбий постларга қилинган ҳужумни Индонезия ҳарбийлари март ойи охирида ҳомиладор аёл ва икки исёнчини ўлдиргани учун “қасос” деб изоҳламоқда.
Янги зеландиялик учувчининг гаровга олиниши
Филип Мертенс — Янги Зеландиянинг Susi Air чартер авиакомпанияси учувчиси. 7 февраль куни у беш нафар ишчини янги касалхона қуриш учун оролнинг ички қисмидаги чекка ҳудудда жойлашган кичик Пару шаҳри аэропортига етказганди. Айирмачилар самолётни ёқиб юборишган, ундаги барча одамлар эса гаровга олинган. Бир неча кундан кейин ишчилар папуас аҳолисига мансуб бўлгани учун қўйиб юборилган. Мертенс гаровда қолган.
Кўп ўтмай айирмачилар Мертенснинг тириклигини тасдиқловчи фотосурат ва видеоларни чоп этди. Улар Индонезия расмийларидан Ғарбий Папуа мустақиллигини тан олишни талаб қилиб, акс ҳолда учувчини ўлдиришни ваъда қилди. Айрим видеоларда Мертенснинг ўзи қоғозда олдиндан тайёрланган матнни ўқиб, исёнчиларнинг ҳаракатларини қўллаб-қувватлашини билдирган. Бунга жавобан Индонезия ҳукумати Ғарбий Папуа мамлакатнинг ажралмас қисми эканини эълон қилди.
Кейинчалик, расмийларнинг сўзларига кўра, айирмачилар Мертенсни қурол ва ўқ-дориларга алмаштиришга тайёр эканини эълон қилиб, баъзи талабларидан воз кечган — аммо бу ҳам ҳукумат томонидан рад этилган.
Март ойи охирларида Мертенсни озод қилиш бўйича операциянинг асосий босқичи бошланди. Ҳарбийлар ва полиция бўлгинчилар қароргоҳига ҳужум қилиб, қуролли тўқнашувлар яна бир неча кун давом этган. Аммо у ердан Филип Мертенсни топа олишмаган.