Навоий вилояти Хатирчи туманида 17 ёшли ўқувчи қиз кўп миқдорда дори ичиб, жонлантириш бўлимига тушиб қолди. Вилоят прокуратураси ахборот хизмати ҳолат юзасидан маълумот берди.
Ижтимоий тармоқларда 17 ёшли қиз мактабдаги жанжалдан сўнг игна ютгани ва ортидан кўп миқдорда дори ичиб, ўз жонига қасд қилгани айтилган. Аниқланишича, Хатирчи туманидаги умумий ўрта таълим мактабларининг бирида ўқиётган, вояга етмаган С.А 7 апрель куни соат 14:10 ларда яшаш ҳовлисида кўп миқдорда дори истеъмол қилиб, соғлиғи ёмонлашгани сабабли туман тиббиёт бирлашмаси жонлантириш бўлимига олиб келинган.
Беморнинг аҳволи оғирлашгани учун у Республика шошилинч тез тиббий ёрдам илмий маркази Навоий филиалининг жонлантириш бўлимига кўчирилган. Бугунги кунда бемор кома ҳолатида бўлиб, шифокорлар томонидан унга даво муолажалари олиб борилмоқда.
Хатирчи туман прокуратураси томонидан ҳодиса жойи кўздан кечирилиб, судга оид тиббиёт экспертизаси тайинланган. Мазкур ҳолат юзасидан туман прокуратураси томонидан терговга қадар текширув ҳаракатлари олиб борилмоқда.
Изоҳ (0)