Shimoliy Koreya “radioaktiv sunami” keltirib chiqarishga qodir bo‘lgan suvosti dronini sinovdan o‘tkazdi, deb xabar bermoqda “Koreya Ovozi” davlat radiosi.
“Ushbu maxfiy qurol yadroviy suvosti kemasi hujumini amalga oshiruvchi drondir. Uning vazifasi — yashirincha suzib borish, suv ostida portlab, dushman kema guruhlari va portini yo‘q qilish uchun o‘ta kuchli radioaktiv sunami hosil qilish”, — deyiladi xabarda.
Maʼlumotlarga ko‘ra, dron 21-mart kuni sinovdan o‘tkazilgan va u 80—150 metr chuqurlikda taxminan 59 soat harakatlangan. Belgilangan nuqtaga yetib borgach, shartli dushman porti yaqinida dron tajribali jangovar kallakni portlatgan.
“Koreya Ovozi” shuningdek, 22-mart kuni Shimoliy Koreya harbiylari mashg‘ulotlar doirasida ikkita “Xvasar-1” seriyali strategik qanotli raketa va ikkita “Xvasar-2” seriyali raketasini uchirgani haqida xabar berdi.
Mahalliy matbuotning yozishicha, sinovlar AQSH va Janubiy Koreya harbiy mashg‘ulotlariga javoban o‘tkazilgan.
Mart oyi o‘rtalarida AQSH va Janubiy Koreya “Ozodlik qalqoni” deb nomlangan qo‘shma mashg‘ulotlar o‘tkazgan edi. Vashington va Seul Shimoliy Koreyaning ballistik raketa sinovlari fonida KXDRdan ehtimoliy tajovuzni qaytarish ssenariylarini ishlab chiqdi — 2022-yilda Shimoliy Koreya 37 marta raketa sinovini amalga oshirdi, ularda 70 ga yaqin raketa uchirildi.
Izoh (0)