Қорақалпоғистоннинг Тўрткўл туманида машинани ўғирлаб, бошқа ҳудудга ташлаб қочган икки ўсмир ушланди. Бу ҳақда Тергов департаменти ахборот хизмати хабар берди.
Хабарга кўра, 8 апрель куни соат 00:15 ларда номаълум шахс Тўрткўл тумани Қозоғистон кўчасида яшовчи 36 ёшли Р.А.га тегишли мовий рангли Cobalt’ни уйининг олдида турган жойида калити билан эшикларини очиб, олиб қочган ва Шархтор кўчасида қолдириб, ҳодиса жойидан яширинган.
Олиб борилган тезкор-қидирув тадбирлари давомида, ушбу жиноятни 15 ёшли вояга етмаган И.А. ва К.Б.лар бир гуруҳ бўлиб олдиндан жиноий тил бириктириб, содир қилгани аниқланиб, ушланган.
Мазкур ҳолат юзасидан Тўрткўл тумани ИИБ ҳузуридаги Тергов бўлими томонидан Жиноят кодексининг 267-моддаси 2-қисми “б” банди (транспорт воситасини олиб қочиш) билан жиноят иши қўзғатилган.
Қайд этилишича, жиноят иши доирасида гумонланувчилар сўроқ қилиниб, улардан нима сабабдан ушбу жиноятга қўл ургани сўралганда, вояга етмаганлар 6 апрель куни жабрланувчи уйининг ёнидан ўтиб кетаётган вақтларида мазкур автомашина қаровсиз, эшиклари очиқ ҳамда калити ўзида бўлганидан фойдаланиб, калитини ўғирлаб ҳодиса жойидан яширинганини айтган. Шунингдек, икки кун ўтиб, автомашина жойида турганидан фойдаланиб уни аввал ўғирлаб кетган калити ёрдамида очиб, шунчаки бошқариш учун олиб қочишганини маълум қилган.
Изоҳ (0)