Qoraqalpog‘istonning To‘rtko‘l tumanida mashinani o‘g‘irlab, boshqa hududga tashlab qochgan ikki o‘smir ushlandi. Bu haqda Tergov departamenti axborot xizmati xabar berdi.
Xabarga ko‘ra, 8-aprel kuni soat 00:15 larda nomaʼlum shaxs To‘rtko‘l tumani Qozog‘iston ko‘chasida yashovchi 36 yoshli R.A.ga tegishli moviy rangli Cobalt’ni uyining oldida turgan joyida kaliti bilan eshiklarini ochib, olib qochgan va Sharxtor ko‘chasida qoldirib, hodisa joyidan yashiringan.
Olib borilgan tezkor-qidiruv tadbirlari davomida, ushbu jinoyatni 15 yoshli voyaga yetmagan I.A. va K.B.lar bir guruh bo‘lib oldindan jinoiy til biriktirib, sodir qilgani aniqlanib, ushlangan.
Mazkur holat yuzasidan To‘rtko‘l tumani IIB huzuridagi Tergov bo‘limi tomonidan Jinoyat kodeksining 267-moddasi 2-qismi “b” bandi (transport vositasini olib qochish) bilan jinoyat ishi qo‘zg‘atilgan.
Qayd etilishicha, jinoyat ishi doirasida gumonlanuvchilar so‘roq qilinib, ulardan nima sababdan ushbu jinoyatga qo‘l urgani so‘ralganda, voyaga yetmaganlar 6-aprel kuni jabrlanuvchi uyining yonidan o‘tib ketayotgan vaqtlarida mazkur avtomashina qarovsiz, eshiklari ochiq hamda kaliti o‘zida bo‘lganidan foydalanib, kalitini o‘g‘irlab hodisa joyidan yashiringanini aytgan. Shuningdek, ikki kun o‘tib, avtomashina joyida turganidan foydalanib uni avval o‘g‘irlab ketgan kaliti yordamida ochib, shunchaki boshqarish uchun olib qochishganini maʼlum qilgan.
Izoh (0)