“Давлат имтиҳонини дала шийпонида олганмиз, бир йилда 6 ой пахта терганмиз”. Меҳнат фахрийси мажбурий меҳнат ҳақида

Қашқадарёлик меҳнат фахрийси Одил Бобоев ўқитувчилик йилларини эслаб, 43 йиллик фаолияти давомида ўқувчилардан давлат имтиҳонини дала шийпонида олганини, нафақат ўқувчилар, ўқитувчилар ҳам бир йилда олти ойлаб пахта даласида юрганини эсга олди.

“Ҳозирги замонга шукрона келтириб яшашимиз керак, боиси тарихда бунақа замон бўлмаган. Буни мен тенги боболарнинг кўпи ўз кўзи билан кўрган. Биз таълимда ишлаган пайтларда шунақа вазиятлар бўлганки, давлат ва кириш имтиҳонини дала шийпонида олганмиз. Бир йилда олти ой пахта даласида бўлганмиз. 4 майдан далага ягона, ўтоқ деб чиқиб кетиб, декабрь охирида уйга қайтганмиз. Пахта мавсумидан сўнг кўча тозалиги-ю, ариқларни тозалаш ишлари билан шуғулланганмиз. Шунақа замонда яшаган халқимизга раҳмат айтаман. Талабалар ўқишга бир қўлида сумка, бир қўлида белкурак кўтариб келарди. Одамлар ҳам мен боламни дарсга жўнатяпман, нега ўқишда эмас деб бирор марта эътироз билдирмаган. Шунинг учун ҳам президентимизга минг раҳмат, бунақа имконият яратиш қаҳрамонлик”, — дейди меҳнат фахрийси Одил Бобоев.

Меҳнат фахрийсининг таъкидлашича, президент Шавкат Мирзиёев ташаббуси билан бугун таълимда ишловчиларга яхши имтиёзлар берилди, тадбиркорларга кенг имконият яратилди.

“Қарангки, ўша пайтда ўзимизнинг келажагимизга болта уриб, юқоридан келган топшириқни бажариш учун ҳамма нарсадан воз кечдик. Ўзимиз ҳам шундай қилганмиз. Эндичи, энди шунақа яхши замонда яшаяпмизки, буни қадрига етишимиз керак. Ўзбекистонда имконият ва шароит бор, шундай ривожланишда давом этсак, энг ривожланган давлатга айланамиз”, — дейди меҳнат фахрийси.

Эслатиб ўтамиз, "Менимча" кўрсатувининг эфирга берилган навбатдаги сонида узоқ йиллик пахта сиёсати ўзбек миллатини не кўйларга солгани ҳақида сўз борганди. 

"Биз узоқ йиллар давомида ‘пахта кишани’дан воз кечолмадик, ‘пахта қули’ деган тавқи-ланъатни пешонамиздан ювиб ташлашга қўлимиз бормади. Пахта даласига бодроқдай тўкилган ёш-ёш болалар, мактабда ўқиш ўрнига қўлини қонатиб, чаноқ чангаллаган ўқувчилар, дала қуёшида куйиб кетган касалманд гўдаклар ҳали ҳеч қайсимизнинг эсимиздан чиққани йўқ, чиқмайди ҳам. Бу сизу бизнинг яқин ўтмишдаги кечмишимиз эди", — дея қайд этганди кўрсатув муаллифи Хайрулла Нуриддинов.