Давлат хавфсизлик хизмати ходимлари ноқонуний равишда АҚШга юбормоқчи бўлган шахсларни ашёвий далиллар билан қўлга олди, деб хабар беради ЎзА.

Қайд этилишича, ҳуқуқни муҳофаза қилувчи органлар ҳамкорлигида тезкор тадбир ўтказилган. Тадбирда фуқаро А.И.ни 30 минг АҚШ доллари эвазига Туркия давлати орқали Америка Қўшма Штатларига ноқонуний равишда ишга юбормоқчи бўлган шахс З.Н.ни 5 минг АҚШ доллари олган вақтида қўлга олинди.

Яна бир ҳолатда, ҳамкорликда ўтказилган тезкор тадбирда фуқаро О.Р. ва бошқалар фуқаро А.С.ни 20 минг АҚШ доллари эвазига танишлари ёрдамида АҚШга юборишга келишиб, шундан 5 минг долларни олган вақтида ашёвий далиллар билан ушланган.

Тошкентда фуқарони 20 минг доллар эвазига АҚШга юбормоқчи бўлган талаба ушлангани, Самарқанд шаҳрида 64 нафар фуқарони АҚШга юборишини айтиб, уларнинг 4 миллиард сўмини ўзлаштирганларга суд ҳукми ўқилгани тўғрисида хабар берилганди.

Аввалроқ чет элда ишламоқчи бўлган Ўзбекистон фуқаролари учун Германия, Исроил, Япония, Россия, Латвия, Литва, Болгария, Польша давлатларига бўш иш ўринлари таклиф этаётгани маълум қилинганди.