Ўзбекистон Энергетика вазирлиги бошчилигидаги ишчи гуруҳ 10 апрель куни Шимолий Сўх ерости газ сақлаш иншоотида табиий газни сақлаш тизимини тиклашга доир лойиҳа бўйича Қирғизистоннинг Қадамжай туманига борди.
Қирғизистон тарафидан тузилган ишчи гуруҳ билан учрашувда тегишли тадбирларни амалга ошириш муҳокама қилинган. Ҳудуддаги газ қудуқлари ҳолати кўздан кечирилиб, лойиҳа доирасида амалга ошириладиган навбатдаги қадамлар белгиланган.
Ўзбекистон президентининг Қирғизистонга давлат ташрифи чоғида Сўхдаги ерости газ омборини тиклаш билан боғлиқ келишувлар амалга оширилган эди. Шимолий Сўх ерости газ сақлаш иншоотида табиий газни сақлаш тизимини тиклаш лойиҳаси ҳам шу режадан ўрин олган.
Шунингдек, икки давлат энергетика вазирлари томонидан ҳам мазкур лойиҳанинг техник-иқтисодий асосини тайёрлаш учун йўл харитаси имзоланган. Жумладан, Ўзбекистон томонидан 15 кишидан иборат ишчи гуруҳ ҳам шакллантирилган. “ЎзЛИTИнефтгаз” билан биргаликда Шимолий Сўх ГЁСИ қудуқларида дала тадқиқотларини ўтказиш учун техник топшириқ ишлаб чиқилган.
Изоҳ (0)