O‘zbekiston Energetika vazirligi boshchiligidagi ishchi guruh 10-aprel kuni Shimoliy So‘x yerosti gaz saqlash inshootida tabiiy gazni saqlash tizimini tiklashga doir loyiha bo‘yicha Qirg‘izistonning Qadamjay tumaniga bordi.
Qirg‘iziston tarafidan tuzilgan ishchi guruh bilan uchrashuvda tegishli tadbirlarni amalga oshirish muhokama qilingan. Hududdagi gaz quduqlari holati ko‘zdan kechirilib, loyiha doirasida amalga oshiriladigan navbatdagi qadamlar belgilangan.
O‘zbekiston prezidentining Qirg‘izistonga davlat tashrifi chog‘ida So‘xdagi yerosti gaz omborini tiklash bilan bog‘liq kelishuvlar amalga oshirilgan edi. Shimoliy So‘x yerosti gaz saqlash inshootida tabiiy gazni saqlash tizimini tiklash loyihasi ham shu rejadan o‘rin olgan.
Shuningdek, ikki davlat energetika vazirlari tomonidan ham mazkur loyihaning texnik-iqtisodiy asosini tayyorlash uchun yo‘l xaritasi imzolangan. Jumladan, O‘zbekiston tomonidan 15 kishidan iborat ishchi guruh ham shakllantirilgan. “O‘zLITIneftgaz” bilan birgalikda Shimoliy So‘x GYOSI quduqlarida dala tadqiqotlarini o‘tkazish uchun texnik topshiriq ishlab chiqilgan.
Izoh (0)