Туркманистон собиқ президенти Гурбангули Бердимуҳамедовнинг онаси, амалдаги давлат раҳбари Сердар Бердимуҳамедовнинг бувиси Ўғулобод Бердимуҳамедова вафот этгани муносабати билан мамлакатда 15 апрелга қадар барча тўй тадбирлари бекор қилинди ва банкет залларининг иши тўхтатилди. Бу ҳақда “Azatlik” хабар бермоқда.
Ўғулобод Бердимуҳамедова 7 апрель куни 86 ёшида вафот этди. Шавкат Мирзиёев Гурбангули Бердимуҳамедовга унинг онаси вафот этгани муносабати билан ҳамдардлик билдирди.
Ўғулобод Бердимуҳамедова давлат лавозимларида ишламаган, камдан-кам ҳолларда оммага кўриниш берган, шу билан бирга давлат матбуоти унинг “миллий хазинани бойитишдаги” улкан хизматлари ҳақида ёзмоқда.
“Олти нафар фарзандини умуминсоний ғоялар, ўз она юртга муҳаббат руҳида тарбиялаш, ҳар томонлама етук, обрў-эътиборли инсонлар бўлиб етишиши учун Ўғулобод эже салмоқли ишларни амалга оширди. Миллий меросни бугунги давр руҳига мос равишда бойитиш, халқнинг ўзига хос анъаналари давомийлигини таъминлаш, тикувчилик санъати ҳақидаги билимларни асраб-авайлаш ва кейинги авлодларга етказишда Ўғулобод эженинг хизматлари катта. Унинг ҳаёт йўли туркман аёллари учун ибрат мактабидир”, — деб ёзади “Туркменистан.ру”.
ОАВ ёзишича, ҳудудларда барча оммавий тадбирлар бекор қилинган.
Туркманистон президентининг марҳум бувиси хотирасига бағишланган маросимда қатнашиш учун вилоятлардан Ашхободга давлат муассаса ва корхоналари раҳбарлари, ички ишлар бўлимлари раҳбарлари, поликлиникалар бош шифокорлари юборилган.
Йўл ҳаракати полицияси ходимлари ҳайдовчиларга машиналарида мусиқа тинглашни тақиқламоқда. Шаҳарларда реклама мониторлари ўчирилган.
Гурбангули Бердимуҳамедовнинг отаси Маликгули Бердимуҳамедов 2021 йил 18 апрелда 89 ёшида вафот этганди.
Изоҳ (0)