Наманган шаҳар Ички ишлар органлари фаолиятини мувофиқлаштириш бошқармаси ходими вилоят ИИБ раҳбариятига мурожаат қилиб, унга пора таклиф этаётганларга қонуний чора кўришни сўраган. Бу ҳақда “Дарё” мухбири Азизбек Абдувалиев хабар бермоқда.
Маълум бўлишича, жорий йил 23 январь куни Наманган шаҳрида яшовчи фуқаро 153 миллион сўмлик тамаки маҳсулотларини ноқонуний равишда муомалага киритаётган вақтда ушланган. Унга нисбатан жиноят иши қўзғатилиб, қамоққа олиш эҳтиёт чораси қўлланган.
Мазкур жиноят иши бўйича айбланувчининг таниши уни қамоқдан чиқариб бериш эвазига ИИБ масъул ходимига 20 минг АҚШ доллари миқдорида пора таклиф қилган.
Ходимнинг мурожаатига асосан жорий йил 6 апрель куни ИИВ Шахсий хавфсизлик бош бошқармаси Наманган вилоят бўйича бошқармаси томонидан тезкор тадбир ўтказилди. Тадбир давомида мурожаатда номи келтирилган шахс ходимга таклиф қилинган суммадан 5000 долларини пора сифатида бераётган вақтда қўлга олиниб, тегишли тартибда процессуал ҳужжатлар расмийлаштирилди.
Ҳозирда мазкур ҳолат юзасидан тергов ҳаракатлари олиб борилмоқда.
Изоҳ (0)