Ўзбекистонда давлат дастурларига ажратилган қарийб 21 триллион сўм маблағнинг мақсадли сарфланиши ва ишлар сифати юзасидан тизимли назорат ўрнатилган. Бу ҳақда бош прокуратура бўлим прокурори Фаррух Султонов маълум қилди.
Унинг сўзларига кўра, шунингдек, “Ташаббусли бюджет” жараёнларининг биринчи мавсумида тасдиқланган 1 666 та лойиҳани амалга ошириш учун йўналтирилаётган 1 триллион 571 миллиард сўм маблағнинг мақсадли сарфланиши назорат қилиб борилади.
Бундан ташқари, дастурлар ижро этилишини назорат қилиш ва мувофиқлаштириш бўйича Республика ва ҳудудий штаблар ҳамда ишчи гуруҳлар фаолияти йўлга қўйилган. Штаблар томонидан Инвестиция дастуридаги 1 378 та, “Янги Ўзбекистон” массивларидаги 827 та ва маҳаллалар инфратузилмасини ривожлантириш дастуридаги 6 007 та лойиҳанинг ҳар бири мониторингга олинган.
2023 йилнинг ўтган даври мобайнида маҳаллалар инфратузилмасини ривожлантириш дастури доирасида кўрилган чора-тадбирлар натижасида 3 238 та объектда қурилиш ишлар якунланиб, фойдаланишга топширилган. Жумладан, 514 та ичимлик ва оқова сув таъминоти, 328 та электр тармоғи, 54 та газ таъминоти, 104 та ижтимоий соҳа ва 428 та бошқа турдаги объектларда қурилиш-таъмирлаш ишлари якунланган.
Таъкидланишича, прокуратура органларида жорий этилган “Бюджет назорати” электрон дастури орқали барча объектлар бўйича онлайн мониторинг йўлга қўйилган. Интернетда очилган махсус канал ва прокуратура органларида ишга туширилган “очиқ телефон” орқали эса кенг жамоатчилик учун дастурлар ижросининг боришини муҳокама қилиш имкони яратилган.
“Ташаббусли бюджет” жараёнларининг биринчи мавсуми ғолиб лойиҳалари 7 апрель куни “Очиқ бюджет” ахборот порталида эълон қилинди. Овоз бериш якунларига кўра, Ўзбекистон бўйлаб тасдиқланган 33 680 та лойиҳадан 1 666 таси ғолиб деб топилди. Ушбу лойиҳаларда келтирилган ташабусларни амалга ошириш учун 1 триллион 571 миллиард 963 миллион сўм маблағ йўналтирилади. Ўз навбатида Иқтисодиёт ва молия вазирлиги мазкур жараёнда иштирок этган барча фуқароларга миннатдорчилик билдириб, “Ташаббусли бюджет” лойиҳасининг кейинги мавсум жараёнларида фаол бўлишга чақирди.
Изоҳ (0)