Қозоғистон Ташқи ишлар вазирлиги Халқаро жиноий суд томонидан Россия президенти Владимир Путинни ҳибсга олишга ордер берганига изоҳ берди. Бу ҳақда Tengrinews хабар берди.
Ташқи ишлар вазирлигининг жавобига кўра, Владимир Путин Қозоғистонга навбатдаги ташриф билан келса, ҳибсга олинмайди.
“Биз Рим статутини имзолаганимиз ёки ратификация қилганимиз йўқ. Низом Қозоғистонга тааллуқли эмас ва у бўйича бизда ҳеч қандай мажбурият йўқ”, — деди ТИВ матбуот котиби Айбек Смадияров.
Путинни ҳибсга олиш ордери
Халқаро жиноий суд (ХЖС) 17 март куни Россия президенти Владимир Путин ва болалар омбудсмани Мария Лвова-Беловани ҳибсга олишга ордер берди. Улар украиналик болаларни Россияга мажбуран депортация қилишда айбланмоқда.
Путин Рим статусини ратификация қилган дунёнинг 123 та давлатидан исталганида трибунал талабига биноан ҳибсга олиниши мумкин. Улар орасида Тожикистон ҳам бор. Бундан ташқари Арманистон ҳам Рим статутини ратификация қилиш жараёнида.
Россия Ташқи ишлар вазирлиги Арманистон Халқаро жиноий судининг Рим статутига қўшилишини мутлақо қабул қилиб бўлмаслигини билдирган. Россия Арманистонни Рим статутига қўшилган тақдирда икки томонлама муносабатларда “ўта салбий” оқибатларга дуч келишидан огоҳлантирилган.
Шундан сўнг Арманистон парламенти вице-спикери Акоп Аршакян мамлакат Путинни Халқаро жиноий судга топширишни режалаштирмаётганини айтган. Аршакян Арманистон Россия хавотирларига қулоқ тутганини ва Рим статути Москва билан муносабатларни бузмаслигига ишонч ҳосил қилиши мумкинлигини таъкидлаган.
“Арманистон Конституциявий суднинг қарори ҳеч кимни ҳеч қандай масалада айбдор деб ҳисобламайди ва ҳеч кимни ҳибсга олиш чораларини талаб қилмайди”, — дейди у.
Бундан ташқари, вице-спикер яқинда бошқа давлат билан имзоланган шартнома ҳақида гапирди, унга кўра Рим статути икки томонлама муносабатларга таъсир қилмаслиги керак. У бу қайси давлат эканига аниқлик киритмаган.
“Бундай келишув Россия билан ҳам бўлиши мумкин, бу вариантлардан бири холос. Бир нарса аниқ: биз Россия томонидан билдирилган хавотирларни эшитдик”, — деди Аршакян.
Сиёсатчига кўра, Рим статутининг ратификация қилиниши Арманистонга Озарбайжон ҳарбийларини Тоғли Қорабоғдаги қуролли можаро пайтидаги жиноятлар учун жавобгарликка тортиш воситаларини беради.
Изоҳ (0)