Қозоғистон Фавқулодда вазиятлар вазирлиги раҳбари Юрий Илин Туркиядаги вазият Қозоғистонни сейсмик хавфсизлик масалаларига алоҳида эътибор қаратишга ундаганини таъкидлади, деб хабар бермоқда “Дарё”нинг республикадаги мухбири вазирлик матбуот хизматига таяниб.
Илиннинг сўзларига кўра, Қозоғистон ҳудудининг 40 фоиздан ортиғи ушбу табиий офатни бошдан кечирган. ФВВ тизимига ўтказилган Сейсмология институти кўп йиллар давомида деярли молиялаштирилмаган. 2023 йилда эса ушбу институт жойлашган Олмаотада зилзила хавфини батафсил таҳлил қиладиган 30 дан ортиқ станциялар ўрнатилади. Станциялар жорий йил охиригача Қозоғистон президенти топшириғига биноан маҳаллий бюджет ҳисобидан фойдаланишга топширилади.
Шу билан бирга, вазир бундай ишларни барча зилзила эҳтимоли бор ҳудудларда олиб бориш керак, деб ҳисоблайди. Эксперт огоҳлантириш тизими қандай ишлашини ҳам тушунтириб берди.
“Биз зилзилалар содир бўлиши мумкин бўлган тахминий эпимарказ нуқталарини биламиз, сенсорлар зилзила учун зарурий шароит юзага келаётгани ёки йўқлигини аниқлаш учун марказларга жойлаштирилади. Хавф аниқланган тақдирда, улар аҳолини огоҳлантириш учун автоматик равишда шаҳар ва аҳоли пунктларининг огоҳлантириш тизимига сигнал узатиши керак. Зилзила ўчоғидан аҳоли пунктларига сейсмик тўлқин етиб борадиган ўнлаб сонияларда ҳам бир неча кишининг ҳаёти сақлаб қолиниши мумкин”, — деб ҳисоблайди ФВВ раҳбари.
Шунингдек, у Қозоғистонда сейсмик ҳудудларда лойиҳа ва қурилиш меъёрлари мустаҳкамланганини қўшимча қилди.
“Уларга риоя қилиш лойиҳа ташкилотлари, ишлаб чиқувчиларнинг бурчидир ва қурилиш сифати кўп жиҳатдан уларга боғлиқ. Ҳатто йирик шаҳарларда ҳам, жумладан, ғиштдан қурилган ва фойдаланишга топширилган турар жой бинолари кўп ҳолларда ҳеч қандай стандартларга жавоб бермайди ва ҳалокатли зилзилаларга дош беролмайди. Бу ерда иш кўлами кенг, ишлаб чиқувчиларга қўйиладиган талабларни кучайтириш учун катта молиявий ресурслар ва қонунчиликни қайта кўриб чиқиш талаб этилади”, — дея хулоса қилди Юрий Илин.
Светлана Шестернёва, Олмаота
Изоҳ (0)