Минск вилоят суди Беларусь президентлигига собиқ номзод Валерий Сепкалони сиртдан 17 йилга қаттиқ режимдаги колонияга ҳукм қилди, деб хабар бермоқда “Белта”.
Суд Сепкалони бир қатор жиноий моддалар, жумладан, катта миқдорда пора олиш моддаси бўйича айбдор деб топди.
Аввалроқ “Зеркало ” нашри Сепкало ҳукуматни ағдаришга чақириш, экстремистик тузилмани яратиш ва молиялаштириш, шунингдек, Александр Лукашенкога нисбатан оммавий ҳақорат ва туҳмат каби 9 та модда бўйича айбланганини ёзган эди. Прокуротура Сепкало учун 19 йил қамоқ жазосини сўраган.
Валерий Сепкало 2020 йилда Беларусда бўлиб ўтган президентлик сайловларида қатнашмоқчи эди, аммо ўшанда Марказий сайлов комиссияси уни номзод сифатида рўйхатга олишдан бош тортди, шундан сўнг Сепкало ҳибсга олинишидан қўрқиб, мамлакатни тарк этди.
Унинг рафиқаси Вероника Сепкало эса президентликка номзод Светлана Тихановская ва Мария Колесникова билан бирлашиб, Александр Лукашенкога қарши чиққан “аёллар учлиги”ни ташкил қилди.
Сайловдан кейин Тихановская ва Сепкало ҳукумат босими остида Беларусни тарк этди. Колесникова 2020 йил сентябрида ҳибсга олинди. Бир йил ўтгач, у ҳокимиятни эгаллаб олиш учун фитна уюштириш, Беларусь миллий хавфсизлигига таҳдид солувчи ҳаракатларга чақириш, шунингдек, экстремистик тузилмани яратишда айбдор деб топилиб, 11 йиллик қамоқ жазосига ҳукм қилинди.
2023 йил март ойида Минск суди Светлана Тихановскаяни сиртдан 15 йилга озодликдан маҳрум қилди.
Шунингдек, 2021 йилда Беларусь Олий суди Виктор Бабарикони 14 йиллик колонияга ҳукм қилган эди. Виктор Бабарико 2020 йилда Беларусь президентлиги учун номзодини қўйган ва Лукашенконинг асосий рақиби бўлган.
2023 йил январида эса яна бир собиқ номзод Андрей Дмитриев ҳибсга олинди.
Изоҳ (0)