Йогуртларни ҳаром деб айтган блогер Ҳожиакбар Носиров 15 суткага қамалди

Аctivist номи билан танилган блогер Ҳожиакбар Носиров 5 апрель куни  йогуртлар ҳаром экани тўғрисидаги видеони ижтимоий тармоққа жойлаштирди. Тошкент шаҳар ИИББ ҳолат юзасидан муносабат билдирди.

Ўтказилган текширув давомида блогер юқорида келтирилган видеоролик орқали фуқароларга турли ишлаб чиқарувчи компаниялар маҳсулоти бўлган йогуртларнинг таркибида кармин моддаси бўлгани сабабли уларни истеъмол қилиш мумкин эмаслиги хусусидаги фикрларини тегишли соҳа мутахассисларидан хулоса олмаган ҳолда, ўз ташаббусига кўра, шахсий диний қарашларидан келиб чиққан ҳолда билдирганини маълум қилди.

Ўзбекистон Республикаси Конституциясининг 25-моддасига асосан ҳар ким эркинлик ва шахсий дахлсизлик, шунингдек, 27-моддасига биноан шахсий ҳаётига аралашишдан ҳимояланиш ҳуқуқига эга. Ўзбекистон фуқароларининг юқоридаги кафолатларига монелик қилиш мумкин эмас. Айниқса, алоҳида шахсларнинг ўз ташаббуси орқали турли масалаларга диний тус бериш орқали ўзгаларнинг шахсий ҳаётига аралашишига йўл қўйилмайди.

Шунингдек, Ўзбекистон Республикасининг “Тадбиркорлик фаолияти эркинлигининг кафолатлари тўғрисида”ги қонуннинг 35-моддасига биноан, тадбиркорлик фаолияти субъекти ўз ишчанлик обрўсига путур етказадиган маълумотларга раддия берилишини суд тартибида талаб қилишга ҳақли. Бундай маълумотларга раддия берилиши билан бир қаторда уларнинг тарқатилиши оқибатида етказилган зарарнинг ўрни қопланишини ва маънавий зарар компенсация қилинишини талаб этишга ҳақли.

Бундан ташқари, Ўзбекистон Республикаси “Виждон эркинлиги ва диний ташкилотлар тўғрисида”ги қонунининг 10-моддасига биноан, мамлакат ҳудудида диний мазмундаги материалларни тайёрлаш ва тарқатиш диншунослик экспертизасининг ижобий хулосаси олинганидан кейин амалга оширилади.

Мазкур ҳолат юзасидан ўтказилган текширув жараёнида фуқарога нисбатан Ўзбекистон Республикаси Маъмурий жавобгарлик тўғрисидаги кодекснинг 184-3 (миллий, ирқий, этник ёки диний адоватни тарғиб қилувчи материалларни тайёрлаш, сақлаш ёки тарқатиш) ва 194-моддаларига (ички ишлар органлари ходимининг қонуний талабларини бажармаслик) асосан маъмурий баённома расмийлаштирилган. Жиноят ишлари бўйича Шайхонтоҳур тумани суди томонидан Ҳожиакбар Носировга нисбатан 15 сутка муддатга маъмурий қамоқ жазоси тайинланган.