Ўзбекистон Фанлар академияси академиги Ҳабибулла Акбаров 8 апрель куни 87 ёшида вафот этди. Бу ҳақда Олий таълим, фан ва инновациялар вазирлиги хабар берди.
Ҳабибулла Акбаров фан арбоби, геология соҳасида йирик олим, кўплаб шогирдларнинг устози эди. У 1936 йилда Тошкент шаҳрида туғилган. 1958 йилда Ўрта Осиё политехника институтининг геология-қидирув факультетини тугатган.
Фаолияти давомида Ўрта Осиё геология ва минерал хом ашё институтида сектор мудири (1968-79), бўлим бошлиғи (1979-86), директор ўринбосари (1987–91), 1992–96 йилларда ТошDTУ проректори ва айни шу вақтда университетнинг фойдали қазилма конлари кафедраси мудири лавозимларида ишлаган. 1996 йилдан Ўзбекистон Фанлар академияси Ер ҳақидаги фанлар бўлими раиси ва Фанлар академияси президиуми аъзоси (1997 йилдан) сифатида фаолият юритган.
Атоқли олимнинг эндоген руда конлари ва майдонларини ўрганиш, уларни излашга бағишлаб ёзган кўплаб мақола ва рисолалари, илмий ихтиролари соҳа мутахассислари ва илмий жамоатчиликка яхши маълум.
Эслатиб ўтамиз, 2022 йил 8 декабрда Генетика ва ўсимликлар экспериментал биологияси соҳасида дунёга танилган олим академик Абдумавлон Абдуллаев 92 ёшида вафот этганди. Ундан олдинроқ эса академик Турғунпўлат Даминов 81 ёшида оламдан ўтган эди.
Изоҳ (0)