Тошкент шаҳри Янгиҳаёт туманида 27 март куни харидор қалбаки пулга iPhone сотиб олди. Пойтахт Ички ишлар бош бошқармаси ахборот хизмати ҳолат юзасидан маълумот берди.
Маълум бўлишича, 26 ёшли Н.Ш. iPhone 12 Prо телефонини 5 миллион 900 минг сўмга сотиши ҳақида эълон берган. Тез орада ушбу эълонга нотаниш йигит қўнғироқ қилиб, телефонни сотиб олмоқчи эканини маълум қилган.
Фуқаро Н.Ш. Янгиҳаёт туманидаги 3-метро бекати олдида жойлашган автобус бекатида харидор билан учрашишга келишган. Нотаниш йигит деярли савдолашмай, келишилган пулни Н.га бериб, телефонни олиб кетган. Фуқаро пулларни санаганида бир нечта пулларнинг ҳақиқийлигига шубҳаланган ва бу ҳолатга ойдинлик киритиш мақсадида Тошкент шаҳар ИИББга ариза билан мурожаат қилган.
Ўтказилган терговга қадар текширув жараёнида Н.дан 10 дона 200 000 сўмлик ва 5 дона 100 000 сўмлик, жами 2 500 000 сўм миқдоридаги пуллар ашёвий далил сифатида олинган. Ушбу пул бирликларини аниқлаш мақсадида Тошкент шаҳар ИИББ Эксперт-криминалистика маркази экспертлари томонидан экспертиза ўтказилган. Экспертиза хулосасига кўра, ушбу пул бирликлари қалбаки эканлиги аниқланган.
Мазкур ҳолат юзасидан Янгиҳаёт тумани ички ишлар органи фаолиятини мувофиқлаштириш бўлими ҳузуридаги тергов бўлими томонидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) билан жиноят иши қўзғатилиб, тергов ҳаракатлари олиб борилмоқда.
Изоҳ (0)