Сурхондарё вилояти Жарқўрғон туманида кредит маблағларини ўзлаштирган икки корхона раҳбарларига жиноят иши қўзғатилди. Бу ҳақда Иқтисодий жиноятларга қарши курашиш департаменти ахборот хизмати хабар берди.
Хабарга кўра, Бош прокуратура ҳузуридаги департаментнинг Сурхондарё вилоят бошқармаси томонидан “Микрокредитбанк” АТБ Жарқўрғон филиалининг мурожаатига асосан ўтказилган терговга қадар текширувда, “Д.С.” хусусий корхонаси раҳбари У.Қ. банк филиалидан ажратилган 600 миллион сўм кредит маблағи эвазига шартномада кўрсатилган Paynet хизматини ташкил этмасдан, ушбу маблағларни ўзлаштириш йўли билан талон-торож қилгани аниқланган.
Шу каби департаментнинг Жарқўрғон туман бўлими томонидан ўтказилган терговга қадар текширувда фуқаро Й.Э турмуш ўртоғининг номига ташкил этган “С.А.” МЧЖни норасмий бошқариб келиб, “Микрокредитбанк” АТБ Жарқўрғон филиалидан ажратилган 300 миллион сўм кредит эвазига иссиқхона ташкил этмасдан, ушбу маблағларни ўзлаштириш йўли билан талон-торож қилгани ҳамда кредит таъминоти сифатида гаровга қўйилган автотранспорт воситаларини қасддан яширгани аниқланган.
Мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 233-моддаси (банд солинган мулкни қонунга хилоф равишда тасарруф этиш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)