7 апрелга ўтар кечаси Исроил армияси Ғазо секторига зарба берди. ОАВ хабар беришича, Исроил Ғазо секторидаги ҲАMAS ҳаракатининг позицияларига ҳужум қилган. Камида 10 та портлаш содир бўлган. Қурбонлар ҳақида ҳозирча маълумот йўқ. Ғазодан Исроилга учирилган жавоб ракеталари эса “Темир гумбаз” ҳаво ҳужумидан мудофаа тизими ёрдамида қайтарилган.
Исроил армияси матбуот хизмати ҳам ҳужумни тасдиқлади. Уларнинг айтишича, бу “Ҳизбуллоҳ” ташкилотининг 6 апрель куни Ливан ҳудудидан туриб Исроилга йўллаган авизарбаларига жавоб бўлган. Ўша куни Исроил бош вазири Биньямин Нетаньяху хавфсизлик бўйича тезкор йиғилиш ўтказганди.
Исроил армияси Ғазодан кейин Ливан ҳудудига ракета ҳужумини уюштирганини хабар қилди. Ҳарбийларнинг баёнотига кўра, улар Ливан жанубида жойлашган “ҲАMAS инфратузилма объектларини нишонга олган”. Al Hadath телеканали гап Тир шаҳри ҳудуди ҳақида кетаётганини ёзди. Унинг манбаларига кўра, Исроил ҳарбий-ҳаво кучлари олтита ракета зарбасини йўллаган.
Эслатиб ўтамиз, 6 апрель куни Ливан ҳудудидан Исроилга 30 га яқин ракета учирилгани маълум қилинди. Бу Исроил ҳукумати томонидан эълон қилинган маълумот ҳисобланади. Ливандаги “Ҳизбуллоҳ” гуруҳи авиаҳужум содир бўлишидан олдин фаластинликларга ҳужум қилган Исроилга қарши “барча чоралар” билан жавоб қайтаришини билдирган.
5 ва 6 апрель кунлари Исроил кучлари Ал-Ақсо масжидидаги фаластинликларга ҳужум қилган. Полиция фаластинликларни тарқатишда электр токи гранаталари ва резина ўқлардан фойдаланган. Исроил ҳуқуқ-тартибот идоралари ўнлаб “вояга етмаган жиноятчилар” полицияга тош отаётгани, хавфсизлик кучлари эса тартибни тиклаш учун ҳаракат қилишга мажбур бўлаётганини иддао қилган.
Фаластин Қизил Ярим Ой жамиятига кўра, Исроил хавфсизлик кучлари шифокорларнинг воқеа жойига келишига ва ярадорларга ёрдам кўрсатишига рухсат бермаган. Исроилнинг хатти-ҳаракатлари, хусусан, Иордания ва Миср томонидан қораланган.
Изоҳ (0)