Хитой раҳбари Си Цзиньпин Франция президенти Эммануэл Макрон билан учрашувда Хитойнинг Украина бўйича позицияси ҳақида гапирди. Бу ҳақда “Ukrinform” хабар берди.
Си Цзиньпиннинг сўзларига кўра, Хитойнинг “Украинадаги инқироз” бўйича позицияси тинчлик музокараларини қўллаб-қувватлашдан иборат.
“Хитойнинг Украинага нисбатан позицияси тинчлик музокараларини қўллаб-қувватлашдан иборат. Хитой томонларни оқилона бўлишга ва тинчлик музокаралари учун биргаликда шарт-шароит яратишга чақиради”, — деди Хитой раҳбари.
Сиёсатчи Еврокомиссия президенти Урсула фон дер Ляен ҳам иштирок этган учрашувда Пекин ҳар доим ўз манфаатларидан келиб чиқиб, ўз позициясини мустақил белгилашини айтди. У ҳозирда устувор вазифа ҳарбий ҳаракатларни тўхтатишга кўмаклашиш, урушни кескинлаштириш ва муаммоларнинг кучайишига йўл қўймаслик эканини билдирди.
“Хитой Европа Иттифоқининг ‘Украинадаги инқироз’ни сиёсий йўл билан ҳал қилиш, Европа хавфсизлигининг мувозанатли, самарали ва барқарор тузилмасини яратиш бўйича ёндашувни ҳамда режаларни таклиф қилиш бўйича саъй-ҳаракатларини қўллаб-қувватлайди”, — деди Хитой раҳбари.
Хитой нима учун Украинага қарши урушни қораламади?
Хитойнинг Европа Иттифоқидаги элчиси Фу Цун Хитой раҳбари ва Украина президенти ўртасида алоқаларнинг йўқлиги Пекин урушда Москвани қўллаб-қувватлаётганини билдирмаслигини айтди. У Хитой Россияни қурол-яроғ билан таъминламагани ва Россиянинг Украина ҳудудларини, жумладан, Қрим ва Донбассни аннексия қилишга уринишларини тан олмаганини таъкидлади.
“Хитой босқинни қораламагани сабаби у Россиянинг НАТО тажовузига қарши мудофаа уруши ҳақидаги даъволарини тушунди ва асосий сабаблар Ғарб раҳбарлари айтганидан кўра мураккаброқ деб ҳисоблади”, — деди Фу Цун.
Ўз навбатида Си Цзиньпин Макрон билан учрашувда Украина президентига вақти келганида қўнғироқ қилишини маълум қилган.
Изоҳ (0)