ИИВ Шахсий хавфсизлик бош бошқармасининг Фарғона вилояти бўйича бошқармаси томонидан ички ишлар органи ходимларининг ижтимоий ҳимояси, ходимларни обрўсизлантирувчи ҳолатлар олдини олиш ва аниқлаш бўйича тезкор тадбир ўтказилди. Бу ҳақда “Zamon” информацион дастурида маълум қилинди.
Қайд этилишича, вилоятнинг Ўзбекистон туманида ўзини “лейтенант” деб таништирган сохта ходим ушланган. Ушбу шахсдан ички ишлар органи ходими кийими ва қўл телефони далилий ашё сифатида олинган.
Муқаддам ўғирлик, фирибгарлик ва талончилик жиноятлари билан шуғулланган мазкур шахс тумандаги маиший хизмат кўрсатиш дўконига кириб, ўзини ИИБ ходими сифатида таништирган ва дўкон эгасига қўлидаги хизмат кийимининг бичимини ўзгартириб беришини айтган.
Дўкон эгаси бошқа иш билан банд бўлган вақтда унинг эътиборсизлигидан фойдаланиб, хонада бўлган 1,8 миллион сўмлик қўл телефонини ўғирлаб, ҳодиса жойидан яширинган. Шундан кейин у яна бир фуқарога ўзини ички ишлар органи ходими дея таништириб, унинг ҳам қўл телефони ва сумкасидаги пулларини ўғирлаган.
Бундан ташқари, гумонланувчи яна бир қиз ва гўшт сотувчини ҳам чув туширган.
Ҳамкорликда ўтказилган тезкор тадбир давомида ушбу шахснинг барча қилмишлари фош бўлган ва унга нисбатан Жиноят кодексининг 169-моддаси (ўғрилик) 3-қисми билан жиноят иши қўзғатилган. Ҳозирда мазкур ҳолат юзасидан дастлабки тергов ҳаракатлари олиб борилмоқда.
Аввалроқ Қашқадарёда ички ишлар ходими кийимида видео олган вайнерларга чора кўрилгани, Тошкентда ўзини ички ишлар ходими деб таништирган шахслар фуқарони уриб, пулини олиб қўйгани тўғрисида хабар берилганди.
Изоҳ (0)