Ўзбекистонда ўтказиладиган референдум бюллетени шакли тасдиқланди

Марказий сайлов комиссиясининг 5 апрель куни бўлиб ўтган мажлисида референдумда овоз бериш бюллетенининг шакли ва тавсифи тасдиқланди. Бу ҳақда МСК матбуот хизмати хабар берди.

Референдумда овоз бериш бюллетенига “Ўзбекистон Республикасининг референдуми тўғрисида”ги қонуннинг 29-моддасига асосан Олий Мажлис Қонунчилик палатасининг 2023 йил 10 мартдаги ҳамда Олий Мажлис Сенатининг 14 мартдаги қарорларида кўрсатилган масаланинг матни киритилган ва овоз берувчи хоҳиш-иродасининг вариантлари “ҳа” ёки “йўқ” деб кўрсатилган. Шунингдек, овоз бериш бюллетенида уни тўлдириш тартиби тўғрисида ҳам тушунтириш берилади.

Овоз бериш бюллетенларини кўзи ожиз овоз берувчилар томонидан тўлдириш учун Брайл алифбоси асосида трафаретлар ҳам тайёрланади.

Овоз бериш бюллетенлари референдум ўтказувчи округ комиссиялари томонидан тақдим этилган маълумотга мувофиқ референдум округи бўйича овоз берувчилар сонини, шу жумладан, референдум округи ҳудудида истиқомат қилаётган кўпчилик аҳоли сўзлашадиган тилларда овоз бериш бюллетенларини тайёрлаш бўйича эҳтиёжни инобатга олган ҳолда чоп этилади.

Комиссия томонидан овоз бериш бюллетенларини референдум ўтказувчи участка комиссияларига белгиланган муддатларда етказиб бериш чоралари белгиланган.

Мажлисда, шунингдек, кун тартибига мувофиқ референдумда хорижий давлатлар ва халқаро ташкилотлардан қатнашадиган кузатувчиларни ҳамда оммавий ахборот воситалари вакилларини аккредитациядан ўтказиш, референдумга тайёргарлик кўриш ва уни ўтказиш юзасидан айрим округ комиссиялари раисларининг ахборотларига оид масалалар кўриб чиқилган.

Жумладан, МСК қарори билан Мустақил давлатлар ҳамдўстлиги Парламентлараро Ассамблеяси, Европада хавфсизлик ва ҳамкорлик ташкилотининг Демократик институтлар ва инсон ҳуқуқлари бюроси, Грузия ва Озарбайжон давлатлари Марказий сайлов комиссияси ҳамда хорижий мамлакатлардан жами 26 нафар кузатувчи аккредитациядан ўтказилган.

Марказий сайлов комиссиясига келиб тушган мурожаатларга кўра, 14 та маҳаллий оммавий ахборот воситасининг жами 62 нафар вакили аккредитациядан ўтказилган. Эндиликда аккредитациядан ўтказилган маҳаллий оммавий ахборот воситалари вакилларининг умумий сони 346 нафарни ташкил этмоқда.

Мажлис давомида референдум ўтказувчи 6-Наманган, 8-Сирдарё, 12-Хоразм округ комиссиялари раисларининг референдумга тайёргарлик кўриш ва уни юқори савияда ўтказиш борасида амалга оширилаётган ишлари хусусида ахборотлари тингланган. Мажлисда кун тартибига киритилган масалалар бўйича тегишли қарорлар қабул қилинган.