Давлат хавфсизлик хизматининг Самарқанд вилояти бўйича бошқармаси ҳамда Чегара қўшинлари ҳарбий хизматчилари томонидан олиб борилган тезкор-қидирув тадбирлари натижасида кўп миқдордаги гиёҳвандлик воситасининг ноқонуний айланмасига чек қўйилди, деб хабар беради ЎзА.
Хусусан, ўзбек—тожик давлат чегарасининг Ургут тумани ҳудудидан ўтувчи қисмида 1997 йилда туғилган маҳаллий фуқаро ушланиб, ундан мамлакатга қўшни Тожикистондан контрабанда йўли билан олиб ўтилган 19 килограмм 799 грамм опий моддаси процессуал тартибда расмийлаштириб олинган.
Ҳозирда мазкур фуқарога нисбатан ДХХ Самарқанд вилояти бўйича бошқармаси томонидан Жиноят кодексининг 246 (контрабанда) ва 273-моддалари (гиёвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек, уларни қонунга хилоф равишда ўтказиш) билан жиноят иши қўзғатилиб, унинг жиноий алоқаларининг шахсига аниқлик киритилмоқда.
Аввалроқ Навоий вилоятида наркотик моддалар савдоси билан шуғулланувчи жиноий гуруҳ қўлга олингани, Тошкентда гиёҳванд моддалар савдоси билан шуғулланган талабалар ушлангани, шунингдек, Самарқанддаги тунги клубда 10 минг доллар эвазига гиёҳванд модда сотишга уринганлар қўлга тушгани тўғрисида хабар берилганди.
Изоҳ (0)