Янгиланаётган Конституция тўғрисида кўплаб давлат ва жамоат вакиллари муносабат билдирмоқда. Сенат раиси Танзила Норбоева ҳам бош қомусни янгилашнинг аҳамияти тўғрисида муносабат билдирди. Парламент юқори палатаси раҳбарининг сўзларига кўра, сўнги 6 йилда амалга оширилган ислоҳотлар Конституцияни янгилашга туртки бўлмоқда.
Конституцияни янгилашнинг аҳамияти
Сенат раиси Танзила Норбоева юқори палатанинг 39-ялпи мажлисида Конституция янгиланишининг долзарблиги ҳақида фикр билдирди.
“Барча ислоҳотлар бир мақсадга — ҳар бир инсоннинг ушбу юртда эркин яшаши ва баркамол ривожланиши учун зарур шарт-шароитларни яратишга қаратилган. Умуман олганда, Конституцияни янгилаш эҳтиёжи ҳам айнан амалга оширилган ўзгаришлардан келиб чиқмоқда. Сифат жиҳатдан ривожланишнинг янги босқичига кўтарилган давлат ва жамият учун янги конституциявий макон зарур эди.
Эришилган натижаларни, кафолатланаётган ҳуқуқ ва эркинликлар давомийлигини таъминлаш, уларга бўлган ёндашувнинг ўзгармаслиги ва барқарор бўлиши учун ҳам уларни ишончли ҳимоясини Конституцияда мустаҳкамлаш муҳим.
Шу билан бирга, Ўзбекистоннинг янги тараққиёт стратегиясида белгиланган катта вазифаларни бажариш учун янги Конституция мустаҳкам ҳуқуқий пойдевор бўлиб хизмат қилади”, — деди Сенат раиси.
Сўз, эътиқод эркинлиги ва мажбурий меҳнат
Танзила Норбоева мажлисда сўзлаган нутқида мамлакатда инсон ҳуқуқларини таъминлаш ишлари аниқ натижаларга олиб келганини таъкидлади.
“Сўз ва эътиқод эркинлигидаги чекловлар олиб ташланди, очиқлик ва шаффофлик таъминланди, давлат органларининг жамоатчилик олдидаги ҳисобдорлиги одатий ҳолга айланди. Мажбурий меҳнат, жумладан, болалар меҳнати буткул барҳам топди, халқаро даражада тан олинди”, — деди у.
Ўсаётган иқтисодиёт
Сенат раисининг қўшимча қилишича, Ўзбекистонда иқтисодий муҳит ҳам сезиларли ўзгарган, тадбиркорлик учун кенг шароитлар яратилган.
“Бунинг натижасида ўтган йилда ялпи ички маҳсулот ҳажми илк бор 80 миллиард доллардан ошди. Иқтисодиётимизга ўтган йилнинг ўзида тўғридан тўғри 8 миллиард доллар хорижий инвестициялар кириб келди, экспортимиз эса 19 миллиард долларга етди”, — деди юқори палата раҳбари.
Маълум қилинишича, республикада уй-жой қурилиши соҳасида охирги олти йилда 300 мингта ёки аввалги йилларга нисбатан 10 баробар кўп уй-жойлар қурилган. Жорий йилда аҳоли учун янги уй-жойлар қуриш ҳажмини 1,5 баробар ошириб, 90 мингга етказиш белгиланган.
.jpg)
“Мактаб ва олий таълимга қамров ошди”
Танзила Норбоева ўз нутқида мактабгача таълим қамрови 5 йил олдинги 27 фоиздан 70 фоизга етгани, беш йилда қамровни 80 фоизга етказиш учун 600 минг янги боғча ўрни яратилиши белгиланганини айтди.
“Бу йилнинг ўзида 70 та янги мактаб қурилади, 460 таси кенгайтирилади. 500 минг ўқувчи ўрни яратилиб, уларнинг жами сони 5,3 миллионга етди. Хусусий инвестициялар иштирокида 100 та мактаб қуриш лойиҳалари бошланмоқда, 5 йилда уларнинг сони 1 000 тага етказилади”, — деди Сенат раиси.
Таъкидланишича, ўтган 5 йил давомида Ўзбекистондаги олий таълим муассасалари 2,5 баробар кўпайиб, 198 тага етган. Қамров даражаси 9 фоиздан 38 фоизга ошган. ОТМларнинг 41 тасига академик ва молиявий мустақиллик берилди, уларда трансформация офислари очилди.
“Талабалар учун имтиёзли таълим кредитлари 2 баробар кўпайтирилиб, 2023 йилда 1,7 триллион сўм ажратилади. Бу йил илм-фан ва инновацияларга 1,5 триллион сўм йўналтирилди. Бу — 2017 йилга нисбатан қарийб 6 баробар кўп”, — деди Танзила Норбоева.
Жорий йилда тиббиёт соҳасида қўшимча 140 та оилавий шифокор пункти ва поликлиникалари, 520 та олис ва чекка маҳаллада ихчам тиббиёт пунктлари ташкил этилиши режалаштирилган. Шунингдек, 15 мингга яқин онкологик беморларни нур ёрдамида даволаш учун ДXШ асосида Радиология марказларини очиш кўзда тутилмоқда.
Исломбек Умаралиев тайёрлади
Изоҳ (0)