Андижон вилояти Избоскан туманида уч туп чинор дарахтини ҳеч қандай рухсатномасиз кесган фуқароларга нисбатан жиноий иш қўзғатилди. Бу ҳақда “Дарё”га Табиат ресурслари вазирлиги вилоят бошқармаси ахборот хизмати хабар берди.
Таъкидланишича, жорий йилнинг 5 апрель куни ижтимоий тармоқларда Избоскан тумани “Ойбек” маҳалласида 50-60 йиллик дарахтлар кесиб ташлангани ҳақида хабарлар тарқалган. Ушбу хабарлар асосида Табиат ресурслари вазирлиги вилоят бошқармаси томонидан тузилган ишчи гуруҳ ҳолат юзасидан ўрганиш ишларини олиб борган.
Ўрганиш давомида 2022 йил 4 апрель куни Избоскан туман “Ойбек” маҳалласи “Миллий қадрият” кўчасида жойлашган уч дона (ғарб) чинор дарахти фуқаролар А.А., И.М. ҳамда М.Т.лар томонидан ҳеч қандай тегишли рухсатномасиз ноқонуний равишда кесиб юборилгани аниқланган.
Суриштирув ишлари натижасида ҳуқуқбузарлар кесилган чинорларни Наманган вилояти, Уйчи туманида жойлашган ёғочни қайта ишлаш цехига олиб бориб сотгани аниқланиб, ушбу ҳолат юзасидан тегишли ҳужжатлар расмийлаштирилган.
Кесилган дарахтлар туфайли ўсимлик дунёсига етказилган зарар 131 миллион 400 минг сўм ҳисобланган. Ушбу ҳолатни қонунан кўриб чиқиш учун тегишли ҳужжатлар туман прокуратурасига тақдим этилган.
Ҳолат юзасидан фуқароларга нисбатан Жиноят кодексининг 198-моддаси (экинзорларни, ўрмонларни, дарахтларни ёки бошқа ўсимликларни шикастлантириш ёхуд нобуд қилиш) 2-қисми билан жиноят иши қўзғатилган.
Изоҳ (0)