Путин Абрамовичнинг офшорлари орқали собиқ ўқитувчисига Исроилдан квартира сотиб олган — WP

Американинг The Washington Post газетаси ва Халқаро тадқиқотчи журналистлар консорсиуми россиялик олигарх Роман Абрамович ва Россия президенти Владимир Путин ўртасидаги молиявий алоқаларни тасдиқловчи ҳужжатларни топди. 

2005 йилда Исроилга давлат ташрифи чоғида Путин россиялик собиқ ўқитувчиларидан бири, кекса яҳудий аёл билан учрашган. Қисқа учрашувдан сўнг Россия раҳбари унга совғалар топширган ва 208 минг долларга унга квартира сотиб олишга рози бўлган.

“Квартирани олганимда йиғлаб юбордим. Путин жуда миннатдор ва муносиб инсон”, — деган Мина Юдицкая-Берлинер эски интервьюда.

Агар квартира хариди учун пул Путиндан келмаган бўлса, янги очилган молиявий маълумотлар шуни кўрсатадики, маблағларнинг ҳақиқий манбаи россиялик миллиардер Роман Абрамович томонидан яширин равишда назорат қилинадиган офшор ҳисобига амалга оширилган.  

The Washington Post нашрининг ёзишича, гап 2000 йиллар ўрталарида тузилган совға шартномаси ҳақида кетмоқда. Унга кўра, Абрамович назоратидаги компания Кипрда Путиннинг собиқ ўқитувчиси, Исроил фуқароси Мина Юдицкая-Берлинерга 245 минг доллар ўтказган. 

Худди шу куни у Тель-Авив марказидаги квартиранинг эгаси бўлган. Юдицкая-Берлинер 1970 йилларда Исроилга кўчиб келган. 2005 йилда Путин Исроилга ташрифи чоғида у билан учрашган. Оммавий ахборот воситаларида Путин унга квартира олишга ёрдам бергани ҳақида хабар берилган.

The Washington Post нашрининг ёзишича, савдо деярли 18 йил олдин амалга оширилган ва рус олигархларининг миллиард долларлик офшор бухгалтерия ҳисобларида уни кўришнинг иложи йўқ. Аммо бу харид катта аҳамиятга эгалиги, чунки Абрамович Путин учун шахсий аҳамиятга эга бўлган келишув марказида тургани таъкидланади.

Путиннинг матбуот котиби Дмитрий Песков тегишли харид юзасидан берилган саволга жавоб бермаган. Абрамовичнинг матбуот котиби совғани тан олган, лекин бу Путиннинг буйруғи билан эмас, балки “яҳудий жамиятидан олинган сўров асосида” қилинганини айтган.

Маълумот ўрнида, Мина Юдицкая 1960 йиллар бўлажак Россия президентига немис тилини ўргатган, у 2017 йил 97 ёшида вафот этган.