Yaponiya va Xitoy tashqi ishlar vazirlari 2-aprel, yakshanba kuni ikki davlat o‘rtasidagi keskinlik fonida uch yildan ortiq vaqtdan beri birinchi marta muzokara o‘tkazdi, deb xabar bermoqda DW.
Yaponiya tashqi ishlar vaziri Yosimasa Xayasining tashrifi yapon diplomatining Xitoyga so‘nggi uch yildagi birinchi tashrifi bo‘ldi, deya qayd etadi AP. Hamkasbi Sin Gan bilan uchrashuvda u yapon fuqarosining Pekinda hibsga olinishiga norozilik bildirdi, shuningdek, Tokio Tayvan yaqinida va Yaponiya atrofida Xitoyning harbiy faolligi kuchayib borayotganidan “kuchli xavotirda” ekanini bildirdi.
Yaponiya farmatsevtika kompaniyasi Astellas Pharma xodimi bir hafta avval Pekinda josuslikda ayblanib, hibsga olingan edi. Ikkala tomon ham unga qo‘yilgan ayblar haqida batafsil ma’lumot bergani yo‘q, deb yozadi AP. Yaponiya TIV maʼlumotlariga ko‘ra, hozirda Xitoyda besh nafar yapon fuqarosi hibsda, ulardan ikki nafari allaqachon sudlangan va aybdor deb topilgan. Sin Gan bunga javoban Xitoy “ishni qonunga muvofiq olib borayotganini” aytdi.
Tayvan atrofida keskinlikning kuchayishi
Xayasi, shuningdek, Xitoyning harbiy faolligi, jumladan, Rossiya bilan hamkorligi va Sharqiy Xitoy dengizidagi harbiy harakatlaridan “jiddiy xavotir” bildirdi. “Biz ikkalamiz ham turli masalalar, jumladan, milliy xavfsizlik masalalari bo‘yicha muloqotni davom ettirish muhimligini yana bir bor tasdiqladik”, — dedi Yaponiya vaziri.
Uning so‘zlariga ko‘ra, tomonlar “konstruktiv va barqaror munosabatlar”ga erishish uchun hamkorlik qilishga kelishib olgan. Sin Gan, o‘z navbatida, Yaponiyani Tayvan bilan bog‘liq masalalarga aralashmaslik haqida ogohlantirdi va Tokio “hech qanday tarzda Xitoy suverenitetiga putur yetkazmasligi” kerakligini aytdi, deyiladi Xitoy Tashqi ishlar vazirligi bayonotida.
Yosimasa Xayasi ta’kidlashicha, kelishmovchiliklarga qaramay, ikki davlat Janubiy Koreya bilan uch tomonlama muzokaralarni davom ettirishga kelishib, buni “muhim yutuq” deb atagan.
Izoh (0)