Хоразмда оилавий тадбиркорлик дастурлари учун берилган 940 млрд сўмга қўшимча 100 млрд сўм йўналтирилади 

Айни вақтда президент Шавкат Мирзиёев халқ депутатлари Хоразм вилояти Кенгаши сессиясида иштирок этмоқда. Бу ҳақда “Дарё” мухбири хабар берди. 

Давлат раҳбари вилоят ҳокими Жўрабек Раҳимовга сўз берди ва ундан вилоят имкониятларини ишга солиш бўйича таклиф ва режаларини сўради.

Ҳоким дастлаб аҳоли бандлигини таъминлаш ва даромадини ошириш масалалари бўйича режаларини маълум қилди. Президент бу борада мутасаддиларга қатор топшириқларни берди. 

Хусусан, 1 июлгача оилавий тадбиркорлик дастурлари учун берилган 940 миллиард сўмга қўшимча 100 миллиард сўм йўналтирилади. Хива шаҳридаги хизмат кўрсатиш техникуми ҳамда Шовотдаги Қурилиш касб-ҳунар коллежи биносида моно-марказ ташкил этилади.

Шунингдек, йил якунига қадар “кооперация марказ”лари Хонқа, Гурлан, Ҳазорасп ва Қўшкўпирдаги бўш турган давлат мулки негизида ҳам ташкил қилинади. 1 июлга қадар тадбиркорлик ривожланган 94 та маҳаллада микро-марказлар ташкил қилиниб, у ердаги лойиҳаларга яна 50 миллиард сўм имтиёзли кредит йўналтирилади. 

Бундан ташқари:

• 2023 йилда маҳаллаларга оилавий тадбиркорликни олиб кириш ва янги тадбиркорларни ташкил қилиш орқали 57 минг аҳоли;
• касаначиликда салоҳияти бор 240 та маҳаллада меҳнат қуроллари ва жой масаласини ҳал қилиб, 50 минг аҳоли;
• янги касбларга ўқитиб, ўзини-ўзи банд қилиш орқали 28 минг аҳоли бандлиги таъминланади.